Þrír ungir menn voru handteknir fyrir ólæti í Kópavogi í nótt. Þetta kemur fram í tilkynningu frá lögreglu þar sem segir að hópurinn hafi gert aðsúg að lögreglu.
Mennirnir eru allir sagðir hafa látið mjög ófriðlega eftir að lögreglan stöðvaði för ökumanns í bænum sem grunaður var um akstur undir áhrifum áfengis og/eða fíkniefna.
Segir að þremenningarnir, sem voru farþegar í fyrrnefndum bíl, hafi þá reynt að tálma störf lögreglunnar á vettvangi og haft uppi grófar hótanir í garð lögreglumanna.
Eftir að ökumaðurinn var handtekinn fóru þremenningarnir síðan að lögreglustöðinni í Kópavogi og héldu þar uppteknum hætti, en svo fór að þeir voru allir handteknir.
Háttsemi mannanna fólst meðal annars í því að hrækja á lögreglumenn, berja og sparka i lögreglubíla og reyna ítrekað að frelsa handtekinn mann.
Á meðal málsgagna eru upptökur úr búkmyndavélum lögreglumanna á vettvangi, að því er segir í tilkynningu lögreglu.
