Sextán tilkynningar vegna gruns um alvarlega aukaverkun vegna bóluefna Covid-19 bárust Lyfjastofnun í nóvember.

Samkvæmt upplýsingum frá Lyfjastofnun er um mismunandi einkenni einstaklinga að ræða, „en flestar eiga tilkynningarnar það sameiginlegt að vera merktar sjúkrahúsvist.“

Þegar Fréttablaðið óskaði eftir svörum um hvað það þýddi að vera merkt sem sjúkrahúsvist fengust eftirfarandi svör frá Lyfjastofnun:

„Þetta þýðir í raun að atvikið leiddi til sjúkrahúsvistar þar sem það á við og er tilkynnt sem slíkt. Um er að ræða grun um aukaverkun og því er tilkynnt um atvikið til Lyfjastofnunar.“ Orðið grunur er feitletrað í svari Lyfjastofnunar til áherslu.

Sláandi skilgreining

Aukaverkanir eru flokkaðar í tvo flokka, alvarlegar og ekki alvarlegar, samkvæmt upplýsingum frá Lyfjastofnun. Skilgreining á alvarlegum aukaverkunum er eftirfarandi:

„Alvarleg aukaverkun er aukaverkun eða óæskileg áhrif lyfs sem leiðir til dauða, lífshættulegs ástands, sjúkrahúsvistar eða lengingar á sjúkrahúsvist, veldur fötlun eða fæðingargalla hjá mönnum.“

Jafnframt kom fram að Lyfjastofnun vildi gjarnan safna þessum upplýsingum um lyfjanotkun og því væri æskilegt að þröskuldur til að tilkynna væri fremur lágur. Þá hvíldi skylda á heilbrigðisstarfsfólki að tilkynna grun um alvarlegar, nýjar eða óvæntar aukaverkanir til þeirra.

Mismunandi einkenni

Meðal þeirra einkenna sem tilkynnt voru í nóvember er hraður hjartsláttur, verkir af ýmsu tagi og áhrif á tíðahring.

Fréttablaðið óskaði eftir svörum um fjölda einstaklinga sem lægu á sjúkrahúsi vegna gruns um alvarlega aukaverkun. Samkvæmt upplýsingum frá Lyfjastofnun er það ekki eitt af lögbundnu hlutverkum stofnunarinnar að veita heilbrigðisþjónustu svo stofnunin var ekki með upplýsingar um fjölda sjúklinga.