Handtökur og húsleitir hafa verið framkvæmdar vegna rannsóknar lögreglu á fjársvikum. Svo virðist sem einstaklingar, sem virðast sérhæfðir í netfjársvikum og peningaþvætti, hafi komið hingað til lands í þeim eina tilgangi að svíkja fé frá fólki.

Einn sat í gæsluvarðhaldi í tæplega hálfan mánuð, en viðkomandi er nú laus úr haldi lögreglu.

Þetta kemur fram í tilkynningu frá lögreglu, en málið varðar svokallaðar skuggasíður, sem voru í nafni Landsbankans.

„Rannsókn málsins hefur leitt í ljós að settar voru upp svokallaðar skuggasíður í nafni Landsbankans, sem grunlausir viðskiptavinir fóru inn á í gegnum leitarvélar (Google, Firefox, Safari), og á meðan viðskiptavinirnir töldu sig vera að tengjast heimabanka sínum voru fjármunirnir millifærðir af reikningi þeirra í rauntíma. Það var eingöngu ef fólk notaði leitarvélar sem þetta gerðist, þeir sem skráðu sig beint á rétta slóð urðu ekki fyrir þessari árás.“ segir í tilkynningunni.

Talið er að hópur einstaklinga hafi verið að verki og að um skipulagða brotastarfsemi hafi verið að ræða, en líkt og áður segir er talið hinir grunuðu hafi komið hingað til lands einungis til að fremja brotin.

Fram kemur að lögreglan vinni málið í nánu samstarfi við banka og CERT-Is til að fyrirbyggja að þetta form netsvindls endurtaki sig.

Lögreglan biðlar til fólks að tengjast heimabönkum sínum beint, en ekki í gegnum Google-vafrann. Auk þess biður hún fólk um að kynna sér netöryggismál og varnir gegn netsvikum sem hafi færst í aukanna síðustu ár.

Uppfært - Fréttin byggir á uppfærðri tilkynningu lögreglu.