Heildarsala fólks- og sendibíla fyrstu tvo mánuði ársins var 40,4% minni en á sama tímabili 2018. Þar af hafa einstaklingar dregið saman kaup sín á nýjum bílum um rúman helming. Þrátt fyrir verulegan samdrátt í samanburði við metárið 2018, sem var einstakt söluár og nær ógerningur að halda í við, hefur BL aukið sína hlutdeild á markaðnum og hefur hlutdeildin í öllum tilfellum vaxið þegar litið er til markaðshópanna þriggja, það er kaupa einstaklinga, fyrirtækja og bílaleiga. Þetta má greina af lestri upplýsinga Samgöngustofu um nýskráningar fólks- og sendibíla. Þannig hafði alls 1.871 fólks- og sendibíll verið nýskráður á árinu um síðustu mánaðamót en þar af átti BL 573 bíla sem eru 30,6% hlutdeild eða 6,5% meiri en BL hafði fyrstu tvo mánuðina 2018.

Samdráttur í febrúar

Samdráttur í nýskráningum fólks- og sendibíla í febrúarmánuði nam 32,8 prósentustigum samanborið við febrúar 2018, en alls voru 895 nýskráðir í febrúar en 1.332 í sama mánuði 2018. Af merkjum BL voru 228 fólks- og sendibílar BL nýskráðir og var markaðshlutdeild fyrirtækisins 25,5% í mánuðinum, 1,5 prósentustigum meira en í sama mánuði 2018.

Vaxandi hlutdeild BL

Þegar litið er til sölu markaðshópanna þriggja á bílamarkaði sem áður voru nefndir kemur í ljós að einstaklingar hafa dregið saman kaup á nýjum bílum um rúman helming, eða 53,5% það sem af er árinu. Samdráttur í kaupum fyrirtækja (án bílaleiga) nemur 31,4% og hjá bílaleigunum nemur samdrátturinn 21,8%. Við þessar ríkjandi aðstæður hefur BL aukið hlutdeild sína hjá öllum meginkauphópunum þremur á árinu. Þannig höfðu einstaklingar keypt 760 fólks- og sendibíla á árinu um nýliðin mánaðamót og er markaðshlutdeild BL í sölu til þeirra 28,2% það sem af er ári, 6,7% meiri en fyrstu tvo mánuðina 2018. Á fyrirtækjamarkaði er hlutdeild BL 32,1%, 2% meiri en 2018 og á bílaleigumarkaði var hlutdeildin 32,5%, 8,1% meiri en 2018.

Dacia söluhæstur hjá BL í febrúar

Dacia var söluhæsta merki BL í febrúar með alls 58 nýskráningar, Nissan í öðru sæti með 50 og Renault í því þriðja með alls 37 nýskráningar. Fast á hæla fylgdi Hyundai með 35 nýskráða bíla. Dacia er sem fyrr afar sterkt merki á bílaleigumarkaði en alls nýskráðu leigur landsins 53 slíka í febrúar, og þá aðallega fjórhjóladrifna jepplinginn Duster. Á sendibílamarkaði er BL með 46% markaðshlutdeild það sem af er ári, þar af 39,4% í febrúar og var Renault söluhæstur merkja BL.

Lúxusbílar BL

Í febrúar voru alls 36 lúxusbílar af merkjum BL nýskráðir frá BMW, Jaguar Land Rover og Mini og var markaðshlutdeild BL á lúxusbílamarkaði 43,3% í mánuðinum. Land Rover var söluhæsta merkið með alls 21 nýskráningu, flestir Range Rover tengitvinnbílar. Sé litið til lúxusbílamarkaðarsins án bílaleiga það sem af er árinu hafa 66 slíkir bílar af merkjum BL verið nýskráðir einstaklingum og fyrirtækjum og er markaðshlutdeild BL á þeim hluta markaðarins nú 39,8% á árinu. Í heildina voru 81 lúxusfólksbíll nýskráður í febrúar af alls 801 fólksbílum, eða 10,1% (ekki sendibílar). Það er ekki ósvipað hlutfall og jafnan, en 11-12% af öllum nýskráðum fólksbílum eru svokallaðir lúxusbílar.