Hjúkrunar- og læknanemar þakka samfélaginu á Blönduósi fyrir að veita þeim aðstoð og hjálp eftir að rúta þeirra valt á hliðina. Nemarnir voru á leið í samfloti til Akureyrar í skíðaferð í tveimur rútum. Tæplega 50 læknanemar voru í rútunni sem valt en hjúkrunarfræðinemar voru fyrstir á vettvang.

Þrír voru í kjölfarið fluttir með alvarlega áverka, meðal annars beinbrot, með þyrlu landhelgisgæslunnar á sjúkrahús í Reykjavík. Annar var fluttur með sjúkrabíl á Heilbrigðisstofnun Norðurlands á Blönduósi með sjúkrabíl.

„Við erum í góðu atlæti í grunnskólanum með nóg af dýnum, sængum og koddum! Þau opnuðu kjörbúðina sérstaklega fyrir okkur, löngu eftir að hún lokaði. Við höfum aðgang að sturtum í íþróttahúsinu við hliðiná. Einn íbúi kom með sérstaka dýnu fyrir bakveika (ef ske kynni að einhver væri bakveikur) og bauðst einnig til þess að koma með rúm sonar síns!“

Þetta segir María Kristjánsdóttir hjúkrunarnemi í færslu sem hún birti á Facebook rétt í þessu. María er stödd á Blönduósi ásamt öðrum hjúkrunar- og læknanemum. Þar gista þau í nótt en hópurinn fékk áfallahjálp eftir að komið var í bæinn eftir slysið. Hjúkrunarnemar sem höfðu unnið á bráðamóttökunni á Landspítalanum voru fyrstir á vettvang og gátu því hlúð að læknanemunum áður en viðbragðsaðilar mættu.

„Þetta er alveg hreint magnað og viljum við að íbúar Blönduóss og þeir viðbragðsaðliðar sem hafa verið okkur innan handar viti hversu mikið við metum þetta! Takk!“

Grunnskólinn í Blönduósi.
Mynd/Aðsend