Hjón, sem vilja ekki láta nafn síns getið, gáfu í morgun þrjátíu milljónir króna í söfnun Rauða kross Íslands til styrktar hjálparstarfi vegna stríðsins í Úkraínu.

RÚV greinir frá.

Samtals hafa um hundrað milljónir króna verið gefnar í söfnun Rauða krossins til styrktar hjálparstarfi vegna stríðsins í Úkraínu.

Kristín Hjálmtýsdóttir, framkvæmdastjóri Rauða kross Íslands, sagði í samtali við fréttastofu RÚV í kvöld að söfnunin gengi vel sem og hjálparstarfið í heild sinni.

Þó gengi hjálparstarfið misvel frá einum stað til annars þar sem ekki hafi verið hægt að komast með aðstoð á suma staði vegna bardaga.

Að sögn Kristínar hafi þó gengið vel að koma hjálpargögnum á ótrúlegustu staði síðustu tvo daga.

Auk fjáröflunarinnar vinnur Rauði krossinn að því að safna fötum, senda erindreka til Úkraínu og landa þar í kring ásamt því að undirbúa komu flóttafólks hingað til lands.

Þá greindi Fréttablaðið frá því í gær að Rauða kross versluninni við Hlemm verði breytt tímabundið í fataúthlutunarstöð fyrir umsækjendur um alþjóðlega vernd og flóttafólk.

Fata­söfnun Rauða krossins fer fram um allt land og hægt er að gefa föt til flótta­fólks í fata­gáma Rauða krossins. Sér­stak­lega er óskað eftir hlýjum vetrar­fatnaði fyrir flótta­fólk, eins og úlpum og vetrar­skóm og hvers­dags­fatnaði, sokka og nær­fatnaði.

Hægt er að senda tölvu­póst á fata­flokkun@redcross.is ef um stærri gjafir er að ræða.