Sáttmáli hefur verið gerður um gagnkvæman skilning atvinnubílstjóra og hjólreiðafólks í umferðinni. Markmið hans er að auka gagnkvæman skilning og koma í veg fyrir slys. Þetta kemur fram á vef Reykjavíkurborgar.

Sáttmálinn var gerður í samvinnu Samgöngustofu, Hjólafærni, Vegagerðarinnar, Eflu verkfræðistofu, Hjólaþjálfun, Landsamtaka hjólreiðamanna, Strætó, Lögreglunnar á höfuðborgarsvæðinu og Reykjavíkurborgar og Siggi danski atvinnubílstjóri kom einnig að undirbúningi hans.

Hugmynd að sáttmálanum kviknaði í kjölfar kynningar Maríu Agnar Guðmundsdóttur hjólreiðakonu og Svavars Svavarssonar ökukennara á ráðstefnu Hjólafærni sem haldin var í september 2018 og bar yfirskriftina Hjólað til framtíðar.

Hjólreiðaslysum hefur fjölgað mikið síðustu ár samhliða fjölgun hjólreiðafólks. Sáttmálinn inniheldur góð ráð til bæði hjólreiðafólks og atvinnubílstjóra til dæmis um blinda svæði bílstjórans og hættuna fyrir hjólreiðafólk að fara yfir gatnamót.

Sáttmálann má finna hér.