Hjólreiðamaður slasaðist við fall á Lækjartorgi í kvöld. Lögreglu- og sjúkrabíll voru sendir á vettvang, en samkvæmt heimildum Fréttablaðsins hjólaði maðurinn á vír sem festir niður jólatré sem er á torginu. Síðan hafa vírarnir verið merktir öryggisborðum.

Stuttu fyrir sjö í kvöld var lögreglubíll og sjúkrabíll sendur til aðstoðar mannsins. Vitni segja að maðurinn hafi ekki virst mikið slasaður, en hann hafi gefið þess merki að hann hafi fallið um vírafestingarnar við tréð.

Skömmu eftir hálf átta í kvöld var maður á vinnubíl kominn á torgið til þess að merkja vírana með öryggisborða.

Fyrr í dag var umdeildasti jólaköttur landsins fjarlægður af Lækjartorgi, en staðsetning kattarins hefur að öllum líkindum valdið því að óþarfi hafi verið að merkja vírana sérstaklega, þar til nú.

Ekki hefur tekist að ná í fulltrúa lögreglu til að staðfesta frásögn vitna eða kanna ástand mannsins frekar.