Lægð fer yfir landið í dag og er áfram von á talsverðri úrkomu sem henni fylgir.

Gul veðurviðvörun hefur verið gefin út fyrir Breiðafjörð, Vestfirði, Strandir og Norðurland vestra og miðhálendið. Veðurstofan hvetur fólk til að skoða þær og fylgjast með hvort nýjar viðvaranir verði gefnar út fyrir helgina.

Í dag hvessir úr norðaustri á norðvestanverðu landinu og má búast við að vindhraði verði allt að 20 m/s, hvassari í hviðum.

Suðaustan 10-15 m/s á Suðausturlandi, en hægari vindur annars staðar. Mikil rigning á Vestfjörðum og Ströndum, annars rigning með köflum, en úrkomulítið á Norðausturlandi.

Fram kemur í hugleiðingum veðurfræðings að útlit sé fyrir að lægðin staldri dálítið við fyrir austan land.


Þá er útlit fyrir norðlæga átt og kalsarigningu á öllu norðanverðu landinu alla helgina. Hiti jafnvel niður í 3 til 4 stig þar og slydda eða jafnvel snjókoma til fjalla á Vestfjörðum.

Á sunnanverðu landinu má þó búast við þurru og björtu veðri í norðanáttinni þó dálítið kaldara verði á mörgum stöðum en verið hefur undanfarna daga.

Veðurhorfur á landinu næstu daga:

Á laugardag: Norðan 10-18 með kalsarigningu á N-verðu landinu og slyddu eða snjókomu til fjalla en þurru veðri sunnan heiða. Hiti 4 til 15 stig, hlýjast SA-lands.

Á sunnudag: Minnkandi norðvestanátt, 3-8 síðdegis. Léttir til S- og V-lands og styttir upp á NA-verðu landinu seinni partinn. Hiti víða 10 til 15 stig, en 5 til 10 á NA- og A-landi.

Á mánudag og þriðjudag: Vestlæg eða breytileg átt, skýjað með köflum og yfirleitt þurrt. Hiti 8 til 15 stig.

Á miðvikudag: Hæg breytileg átt, skýjað og sums staðar dálítil væta.