Svandís Svavarsdóttir tilkynnti á blaðamannafundi ríkisstjórnarinnar í dag að breytingar á sóttvarnareglum taki gildi um hádegi á morgun.

Helstu breytingarnar fela í sér að fjöldasamkomur séu takmarkaðar við 100 manns, börn sem fædd eru 2005 eða síðar eru þar undanskilin, og að tveggja metra reglan verði tekin upp á ný og verði í þetta sinn ekki valkvæð heldur skylda.

Í þeim tilfellum sem ekki er hægt að tryggja tveggja metra á milli einstaklinga þá er þess krafist að fólk noti andlitsgrímur sem hylja bæði munn og nef en að sögn Svandísar á það fyrst og fremst um almenningssamgöngur en einnig um ýmsa aðra þjónustu.

Þegar kemur að aðgerðum á landamærum hefur sóttvarnalæknir mælt með að tvöföld sýnataka verði tekin upp til allra sem koma frá áhættusvæðum og dvelja hér 10 daga eða lengur. Ef það ber ekki árangur þarf hugsanlega að efla aðgerðir á landamærum enn frekar.

„Allar þær ráðstafanir sem hér eru gerðar innanlands eru í samræmi við það sem við þekkjum, við höfum gert þetta áður, við gerðum það vel og við getum gert það aftur vel ef við hjálpumst að og snúum bökum saman með tveggja metra millibili þá ættum við að komast í gegnum þennan skafl,“ sagði Svandís.

„Það þarf að grípa í handbremsuna“

Eins og staðan er í dag eru 39 með virkt smit hér á landi en tíu ný smit bættust við í gær og má búast við að fjöldi fólks í sóttkví, nú 215, aukist á næstunni. Einn er nú á spítala vegna COVID-19.

„Eins og áður hefur komið fram, þegar við slökuðum á takmörkunum í samfélaginu, að við munum áfram fylgjast gríðarlega vel með þróun mála og grípa inn í með mjög afgerandi hætti ef á þyrfti að halda og sú stundin runnin upp núna,“ sagði Katrín Jakobsdóttir forsætisráðherra um stöðuna. „Við erum komin á þann stað að það þarf að grípa til mjög afgerandi aðgerða og það þarf að grípa í handbremsuna.“

Aðgerðirnar í heild sinni má sjá hér fyrir neðan:

  • Takmörkun á fjölda sem kemur saman miðast við 100 einstaklinga. Börn fædd 2005 eða síðar eru undanskilin.
  • Hvar sem fólk kemur saman og í allri starfsemi verði viðhöfð sú regla að hafa a.m.k. 2 metra á milli einstaklinga. 
  • Þar sem ekki er hægt að tryggja 2 metra fjarlægð milli ótengdra einstaklinga er krafist notkunar andlitsgrímu sem hylur nef og munn. Þetta á t.d. við um almenningssamgöngur, þ.m.t. innanlandsflug og farþegaferjur, og starfsemi s.s. hárgreiðslustofur og nuddstofur. Andlitsgrímur sem notaðar eru utan heilbrigðisþjónustu ættu að uppfylla kröfur sem settar eru fram í leiðbeiningum sóttvarnalæknis.
  • Vinnustaðir, opinberar byggingar, verslanir og þjónustufyrirtæki sem eru opin almenningi skipuleggi starfsemi sína í samræmi við ofangreint og tryggi að ekki séu fleiri en 100 einstaklingar í sama rými og að í minni rýmum séu ekki fleiri en svo að hægt sé að tryggja 2 metra fjarlægð milli einstaklinga. 
  • Verslanir, opinberar byggingar og þjónustufyrirtæki sem eru opin almenningi tryggi aðgang að handsótthreinsi fyrir almenning og starfsmenn við innganga og í grennd við yfirborð sem margir snerta s.s. snertiskjái og afgreiðslukassa, sinni vel þrifum og sótthreinsun yfirborða eins oft og unnt er og minni almenning og starfsmenn á einstaklingsbundnar sóttvarnir með merkingum og skiltum. 
  • Sundlaugar og veitingastaðir tryggi að gestir geti haft 2 metra bil á milli sín í öllum rýmum með fjöldatakmörkun í samræmi við stærð hvers rýmis.
  • Sóttvarnalæknir leggur til að starfsemi sem í eðli sínu felur í sér að gestir noti sameiginlegan búnað s.s. íþróttastarf, líkamsræktarstöðvar, spilakassar og spilasalir geri hlé á starfsemi eða sótthreinsi slíkan búnað milli notenda. 
  • Sóttvarnalæknir leggur til að söfn, skemmtistaðir og aðrir opinberir staðir geri hlé á starfsemi sé ekki hægt að tryggja að farið sé eftir fjöldatakmörkun eða að bil milli ótengdra aðila sé yfir 2 metrum. 
  • Opnunartími skemmti- og vínveitingastaða verður áfram til kl. 23:00. 

Fréttin verður uppfærð.