„Við erum komin á þann stað að það þarf að grípa til mjög afgerandi aðgerða og það þarf að grípa í handbremsuna,“ sagði Katrín Jakobsdóttir forsætisráðherra þegar hertar sóttvarnaaðgerðir voru kynntar í gær.

Frá og með hádegi í dag verður fjöldi einstaklinga sem má koma saman takmarkaður við 100 en frá miðjum júní höfðu 500 manns mátt koma saman. Stjórnvöld gripu til aðgerðanna vegna fjölgunar COVID-19 tilfella á síðustu dögum.

Staðfest tilfelli virks smits á landinu voru í gær 39 talsins og var einn inniliggjandi á sjúkrahúsi. Þá eru rúmlega 200 manns í sóttkví en búist er við að þeim fjölgi á næstu dögum.

Aðgerðirnar sem fela einnig í sér að tveggja metra reglan verður aftur tekin upp eru byggðar á tillögum sóttvarnalæknis og setts sóttvarnalæknis.

Þá verður tekin upp tvöföld sýnataka fyrir alla sem koma til landsins frá áhættusvæðum og ætla að dvelja í tíu daga eða lengur. Í minnisblaði sóttvarnalæknis kemur fram að beri þær ráðstafanir ekki tilætlaðan árangur þurfi að herða aðgerðir á landamærum enn frekar.

Í því samhengi mætti hugleiða að taka upp 14 daga sóttkví fyrir alla sem koma frá áhættusvæðum eða sýnatöku að lokinni fimm til sjö daga sóttkví.

Frá blaðamannafundi stjórnvalda í gær þar sem hertar sóttvarnaráðstafanir voru kynntar.
Fréttablaðið/Ernir

Vonbrigði að þurfa stíga skref til baka

Svandís Svavarsdóttir heilbrigðisráðherra segir það vissulega vonbrigði að þurfa stíga skref til baka. Þær ráðstafanir sem nú er gripið til séu í samræmi við það sem áður hafi verið gert. „Við gerðum það vel og við getum gert það aftur vel ef við hjálpumst að og snúum bökum saman með tveggja metra millibili. Þá ættum við að komast í gegnum þennan skafl saman.“

Landsmenn gætu þurft að venjast því að til skiptis væri hert og slakað á reglum næstu mánuðina. Hertar aðgerðir gilda í tvær vikur en Svandís segir að staðan verði metin á hverjum degi. Þá hafi það haft áhrif að verslunarmannahelgin sé framundan.

„Sótt­varna­­læknir rök­­styður þetta með því að það sé skyn­­sam­­legt að stíga mjög á­­kveðið niður fyrir þessa miklu ferða­helgi frekar en að bíða og sjá og vera þá mögu­­lega að eiga við miklu stærra og flóknara vanda­­mál um miðjan ágúst,“ segir Svandís.

Ákvörðunin um hertar aðgerðir hefur það í för með sér að þeim viðburðum sem skipulagðir höfðu verið um verslunarmannahelgina hefur verið aflýst. Víðir Reynisson yfirlögregluþjónn beindi orðum sínum til unga fólksins sem beðið hefur spennt eftir því að fara í útilegu. Slíkt yrði að bíða.

„Við erum ekki komin á það að vera með neyðar­á­stand og með sam­eigin­legum að­gerðum ætlum við að koma í veg fyrir að við lendum þar,“ sagði Víðir.

Neyðarstjórn Reykjavíkurborgar fundaði í gær vegna stöðunnar. Þjónusta borgarinnar mun í meginatriðum haldast óbreytt en vinnulag sniðið að breyttum reglum.

Opið verður á söfnum og í sundlaugum en fjöldi gesta í hverju rými takmarkaður og gætt að fjarlægðarmörkum. Hið sama gildir um Fjölskyldu- og húsdýragarðinn.

Þetta eru helstu breytingarnar

  • Fjöldi þeirra sem mega koma saman takmarkast við 100 einstaklinga. Börn fædd 2005 eða síðar eru undanskilin.

  • Alls staðar skal miða við að hafa að minnst kosti tveggja metra fjarlægð á milli einstaklinga.

  • Þar sem ekki er hægt að tryggja tveggja metra fjarlægð milli ótengdra einstaklinga er krafist notkunar á andlitsgrímum. Á þetta við um almenningssamgöngur og starfsemi eins og hárgreiðslustofur og nuddstofur.

  • Í verslunum, fyrirtækjum og opinberum byggingum sem eru opin almenningi skal tryggja aðgengi að handsótthreinsi.

  • Í sundlaugum og á veitingastöðum verði með fjöldatakmörkunum í samræmi við stærð hvers rýmis tryggt að gestir geti haldið tveggja metra fjarlægð sín á milli.

  • Lagt er til að annað hvort verði gert hlé á starfsemi þar sem gestir nota sameiginlegan búnað eða hann sótthreinsaður á milli notenda.

  • Lagt er til að söfn, skemmtistaðir og aðrir opinberir staðir geri hlé á starfsemi sé ekki unnt að tryggja fjöldatakmarkanir eða tveggja metra regluna.

  • Allir sem koma til landsins frá áhættusvæðum og dvelja tíu daga eða lengur eiga að fara í tvöfalda sýnatöku. Sé sýni tekið við komuna neikvætt er tekið annað eftir fjóra til sex daga.