Allsherjar herkvaðning hefur verið send út af leiðtogum aðskilnaðarsinna í Donetsk- og Lugansk- héruðunum í austurhluta Úkraínu vegna ótta um að stríðsátök muni brjótast út á næstu dögum.

Yfirvöld í héruðunum hafa hvatt almenning til að forða sér yfir til Rússlands samkvæmt vef AP News.

Myndskeið sem birt var á sam­fé­lags­miðlum og í fjöl­miðlum sýnir Den­is Pus­hil­in, leiðtoga aðskilnaðarsinna í Do­netsk-héraðinu, hvetja sam­borg­ara sína að mæta á herkvaðning­ar­skrif­stof­ur í land­inu þar sem hann væri búinn að skrifa undir tilskipun um herkvaðningu.

Skömmu síðar sendi Leonid Pasechnik, leiðtogi aðskilnaðarsinna í ná­granna­héraðinu Lug­ansk, sambærilega yfirlýsingu.

Áætlað er að um 150 þúsund rússneskra hermanna séu nú staðsettir við landamæri Úkraínu og eiga miklar heræfingar að hefjast í dag.

Á blaðamannafundi í gærkvöldi kvaðst Joe Biden, forseti Bandaríkjanna, vera sannfærður um að Vladimír Pútín, forseti Rússlands, væri búinn að ákveða að gera innrás í Úkraínu.

Þá ítrekaði Biden að árásin gæti átt sér stað á næstu dögum og að líklegt yrði að Rússar myndu gera innrás í höfuðborg Úkraínu, Kænugarð.