Vigdís Hauksdóttir, borgarfulltrúi Miðflokksins, og Kolbrún Baldursdóttir, borgarfulltrúi Flokks fólksins, óskuðu á fundi borgarráðs í gær eftir umræðu um skýrslu innri endurskoðunar um braggamálið.

Þá lagði Vigdís fram bókun þar sem hún upplýsti að þær Kolbrún myndu á borgarstjórnarfundi á þriðjudaginn flytja tillögu um að skýrslunni verði vísað til héraðssaksóknara til frekari yfirferðar og rannsóknar.

„Innri endurskoðandi hefur eftirlátið borgarfulltrúum úrvinnslu skýrslunnar og teljum við okkur vera að bregðast ríku eftirlitshlutverki okkar sem kjörinna fulltrúa ef við myndum ekkert aðhafast í kjölfar hennar,“ segir Vigdís í bókun sinni.

Vigdís sagði jafnframt að í skýrslunni mætti finna „mjög alvarlegar athugasemdir og ábendingar“ meðal annars um „alvarleg lögbrot sem of langt mál er að fara yfir í bókun þessari“.

Í bókuninni rökstyður Vigís þessa ákvörðun þeirra Kolbrúnar Baldursdóttur meðal annars með vísan í almenn hegningarlög um skyldur opinberra starfsmanna í störfum sínum.

Vigdís lét einnig færa til bókar að hún furðaði sig á því að borgarstjóri, borgarritari og borgarlögmaður hafi ekki vikið af fundi þegar málið var rætt þar sem þeir eru „persónur og leikendur“ í málinu og „kjörnir fulltrúar verða að hafa frelsi til beinna samskipta við skýrsluhöfunda í svo alvarlegum málum“ án þess að þeir sem fjallað er um í skýrslunni heyri til.

„Það er mjög nauðsynlegt ekki síst í ljósi þess að mikilvægt er að aðilar geti ekki samræmt framburð sinn eftir því hvernig spurningum borgarfulltrúa og svörum innri endurskoðunar vindur fram.“