Ríkisstjórnin heldur ekki í nýrri könnun Prósents, sem gerð var fyrir Fréttablaðið. Sjálfstæðisflokkurinn fengi 21,3 prósenta fylgi, Framsókn 12,6 prósent og VG fengi slétt 10 prósent.

Könnunin var gerð 13. til 16. september. Alls tóku 1.493 þátt í henni, þar af tóku 1.329 afstöðu, eða 90 prósent.

Þegar fólk var spurt hvaða stjórnarsamstarf því hugnast best að afloknum kosningum kemur þó í ljós að stærstur hluti svarenda vill halda núverandi samstarfi áfram, eða 48,3 prósent.

Könnun Fréttablaðsins
Mynd/Fréttablaðið

Um 27 prósent vilja vinstristjórn með Flokki fólksins, Pírötum, Samfylkingu, Sósíalistum og Vinstri grænum en um 25 prósent vilja miðjustjórn með Framsóknarflokki, Samfylkingu, Viðreisn og Pírötum.

Nánast allir sem ætla að kjósa Sjálfstæðisflokkinn vilja halda samstarfinu áfram, eða 99 prósent. Framsóknarfólk er einnig ánægt með samstarfið, en 76 prósent vilja halda því áfram og mikill meirihluti VG vill það einnig, eða 64 prósent.

Heilbrigðismálin skiptu fólk langmestu máli þegar spurt var um málaflokka, en 72,2 prósent nefndu þau. Atvinnu- og efnahagsmál fá annað sætið og málefni aldraðra eru í þriðja sæti, örlítið ofar en náttúruverndarmál.

Evrópusambandsaðild skiptir mestu máli hjá 11,2 prósentum af þeim sem tóku afstöðu.

Sjálfstæðisflokkurinn er langstærstur í Norðvesturkjördæmi með 30 prósenta fylgi, Samfylkingin mælist stærst í Reykjavíkurkjördæmi suður, eins og Viðreisn, VG og Píratar.

Framsóknarflokkurinn dansar við 20 prósenta línuna alls staðar nema í borginni, þar sem hann fær 9 prósenta fylgi.