Helga Vala Helgadóttir hefur tekið við formennsku þingflokks Samfylkingarinnar. Frá því er greint í tilkynningu frá Samfylkingunni en tillagan var samþykkt á þingflokksfundi í dag.
„Þrátt fyrir sérstakt upphaf kjörtímabils erum við í Samfylkingunni full tilhlökkunar að þing komi saman enda mörg brýn verkefni fram undan auk þess sem við höfum undanfarnar vikur unnið að mikilvægum málum sem við viljum setja á dagskrá,” sagði Helga Vala eftir fundinn.
Helga Vala hefur setið á þingi fyrir hönd Samfylkingarinnar frá árinu 2017. Hún var formaður stjórnskipunar- og eftirlitsnefndar Alþingis á árunum 2017 til 2019 og formaður velferðarnefndar 2019-til 2021.
Þórunn Sveinbjarnardóttir var auk þess kjörin varaformaður þingflokks og Kristrún Frostadóttir ritari þingflokks á fundinum.
