Bráðamóttakan á Landspítala Fossvogi verður nú lokuð gestum í óákveðinn tíma, nema í sérstökum undantekningartilfellum.

Að sögn spítalans var gripið til þessa ráðs til að viðhalda tveggja metra fjarlægðarmörkum og draga úr hættu á yfirálagi á sóttvarnir.

Erfitt sé að stjórna fjölda sjúklinga sem leiti á bráðamóttöku hverju sinni.

Fram kemur í tilkynningu á vef spítalans að börnum yngri en 18 ára verði leyft að hafa með sér einn forráðamann.

Eru aðstandendur beðnir um að hafa samband við starfsfólk spítalans ef óskað er eftir sérstökum undanþágum.

Þá hvetur starfsfólk bráðamóttökunnar aðstandendur til að nýta sér símtöl og myndsímtöl til að eiga samskipti við sjúklinga sem dvelji á sjúkrahúsinu.

Einnig sé hægt að hringja á deildina í síma 543 2000 og fá upplýsingar um sjúklinga. Gæta þarf að því að sjúklingur skilgreinir sjálfur hver er hans nánasti aðstandandi, við hvern starfsmenn mega hafa samband og hvaða upplýsingar viðkomandi má fá.