Einstaklingar í sóttkví hafa gert sér ferð á endurvinnslustöðvar SORPU en slíkt samræmist ekki reglum um sóttkví.

Starfsfólk endurvinnslustöðva hefur ítrekað orðið vart við að fólk í sóttkví komi inn á stöðvarnar. Því er umsvifalaust vísað burt og það tilkynnt ti lögreglu ef það hlýðir ekki fyrirmælum starfsfólks.

„Þetta veldur okkur miklum vonbrigðum,“ segir Guðmundur Tryggvi Ólafsson, rekstrarstjóri endurvinnslustöðva SORPU.

„Gestir okkar og starfsfólk eiga sama rétt og annað fólk á vernd gegn veirunni og því er óskiljanlegt að fólk haldi að það megi koma á endurvinnslustöðvar þegar það er í sóttkví.“

Í tilkynningu frá SORPU kemur fram að heimsókn á endurvinnslustöð samræmist ekki reglum um sóttkví og skiptir þar engu hver ástæða sóttkvíarinnar er. Slík heimsókn sé brot á sóttkví og útsetur gesti og starfsfólk endurvinnslustöðvanna fyrir smitum.

Guðmundur Tryggvi segir helgarnar verða álagspunktar á endurvinnslustöðvunum meðan hertar samkomutakmarkanir eru í gildi. Viðskiptavinir geti lagt sitt af mörkum til að heimsókn á endurvinnslustöð gangi hratt og vel fyrir sig við þessar krefjandi aðstæður.

„Við hvetjum fólk til að koma til okkar á virkum dögum yfir miðjan daginn, vera ekki fleiri saman í bíl en nauðsyn krefur og vera búið að flokka öll endurvinnsluefni áður en lagt er af stað á endurvinnslustöðina. Ef fólk fer eftir þessum ábendingum gengur heimsókn á endurvinnslustöð hraðar og betur fyrir alla,“ segir Guðmundur Tryggvi.

Fólki er bent á að kynna sér reglur um sóttkví á upplýsingavef um COVID-19.