Norræna kemur í höfn á Seyðisfirði í dag með um 750 farþega. Tíu manna sýnatökuteymi starfsfólks Heilbrigðisstofnunar Austurlands auk tæknimanna kom um borð í Færeyjum og skimar farþega úti á sjó.

Samkvæmt tilkynningu Aðgerðastjórnar Austurlands hefst skimun tuttugu og fjórum sjómílum undan strönd landsins og standa vonir til að henni verði lokið áður en til hafnar kemur. Taka þarf sýni úr rétt um fimm hundruð farþegum, nokkuð fleirum en í síðustu ferð. Þeir sem dvalið hafa í Færeyjum, á Grænlandi eða Íslandi síðustu fjórtán daga, eða eru fæddir árið 2005 eða síðar þurfa ekki í sýnatöku.

Aðgerðastjórn á Austurlandi áréttar að farþegar fá allir ítarlegar leiðbeiningar um það hvernig beri að haga sér þegar í land er komið og þá sér í lagi áður en niðurstöður sýnatöku liggja fyrir, að jafnaði innan við sólarhring eftir komu. Mælst er til að þeir fari varlega, haldi kyrru fyrir á heimili eða áfangastað, haldi hæfilegri fjarlægð frá öðru fólki, forðist snertingu eins og faðmlög og handabönd auk þess sem hvatt er til reglulegs handþvottar. Ekki eru gerðar athugasemdir við að þeir fari til að mynda í verslanir og kaupi nauðsynjar.