Maður sem gekk um Tryggvagötu á Selfossi vopnaður boga og örvum var handtekinn af Lögreglunni á Suðurlandi um hálf fimm leytið í nótt.

Samkvæmt tilkynningu fóru lögreglumenn á vettvang og fundu manninn fljótlega. Fylgst var með ferðum hans nokkra stund án hans vitneskju en hann síðan handtekinn á Árvegi til móts við Hörðuvelli án mótþróa.

Maðurinn lagði niður vopn sín strax og skorað var á hann að gera slíkt. Hann var færður í fangahús á Selfossi og bíður þess nú að verða yfirheyrður um ferðir hans og fyrirætlanir í nótt. Sú yfirheyrsla fer fram strax og ástand mannsins leyfir.

Nokkur viðbúnaður var viðhafður vegna atviksins, sérsveit ríkislögreglustjóra sett í viðbragðsstöðu og sjúkraflutningamenn á Selfossi einnig eins og verklagsreglur gera ráð fyrir þegar fengist er við vopnaða menn.

Nýverið var framið ódæði með boga og örvum í Kongsberg í Noregi þar sem fimm létu lífið. Frekari upplýsingar um málið verða ekki gefnar að sinni en málið er til rannsóknar hjá rannsóknardeild lögreglunnar á Suðurlandi.