Þórdís Kolbrún Reykfjörð Gylfadóttir ferðamálaráðherra hefur annað árið í röð ákveðið að auka framlag ráðuneytisins til Hálendisvaktar björgunarsveitanna til að unnt verði að hefja viðveru á hálendinu hálfum mánuði fyrr en gert er ráð fyrir. Þetta kemur fram í tilkynningu á vef atvinnuvega- og nýsköpunarráðuneytisins.

Framlagið sem ráðuneytið veitir til viðbótar nemur 900 þúsund krónum en árlega styrkir ráðuneytið verkefnið um 25 milljónir króna. Viðaukinn nægir Hálendisvaktinni til að hefja störf um miðjan júní en alla jafna hefst starf hennar ekki fyrr en í byrjun júlí. Aðstæður á hálendinu bæði í ár og í fyrra kalla á þessa auknu viðveru.

Hálendisvaktin er hluti af SafeTravel-verkefninu um öryggismál og slysavarnir ferðamanna og er samvinnuverkefni Landsbjargar, atvinnuvega- og nýsköpunarráðuneytisins og Samtaka ferðaþjónustunnar.

„Það var eitt af fyrstu verkum mínum í embætti ráðherra fyrir rúmlega tveimur árum að setjast niður með Landsbjörg og fræðast um SafeTravel-verkefnið,“ segir Þórdís Kolbrún. „Það fór ekki á milli mála hve gott og mikilvægt starf er unnið á vegum SafeTravel. Fáeinum vikum eftir fundinn renndum við því styrkari fjárhagslegum stoðum undir þetta mikilvæga verkefni með nýjum samningi sem fól í sér aukið fjárframlag. Viðaukasamningurinn núna kemur til af sérstökum aðstæðum en er í rökréttu samhengi við áherslur okkar á málefnið.“