Jólin eru svo sannarlega mætt í miðbæinn enda um að gera að finna jólaandann undir beru lofti með því að rölta utandyra, laus við grímur og sprittbrúsa. Jólamarkaðir hafa sprottið upp í Hjartagarði og við Ingólfstorg þar sem einnig má skella sér á skauta.
Þau Róbert Aron Magnússon og Guðrún Lárusdóttir standa að jólamarkaðinum í Hjartagarðinum ásamt Reykjavíkurborg og við heyrðum í Róberti um tilurð hans.

„Í fyrra var ég með Jólabarinn við Hafnartorg sem ég hef reyndar fært hingað á Hjartatorgið í minni útgáfu,“ segir Róbert sem er maðurinn á bak við Götubitann Reykjavík Streetfood.

„Götubitinn hefur undanfarin ár unnið náið með Reykjavíkurborg með svona útimarkaði sem snúa að mat. Í ár óskuðum við svo eftir að fá að sjá um jólamarkaðinn í samstarfi við hana Guðrúnu sem var með sumarmarkaðinn hér síðastliðið sumar. Úr varð svo að við sameinuðumst þrjú, Reykjavíkurborg, Götubitinn og Guðrún, um að búa til skemmtilega jólamarkaðsstemningu á Hjartatorgi og keyrðum það af stað um síðustu helgi,“ útskýrir Róbert og segir viðbrögðin fyrstu helgina hafa lofað góðu.

Færri komust að en vildu


Óskað var eftir umsóknum um sölubása í byrjun nóvember og segir Róbert að yfir 50 umsóknir hafi borist.

„Það var dálítið púsl að vinna úr því en við höfum reynt að raða þessum skilmerkilega niður næstu helgar. Það er eins og alltaf, maður kemur aldrei öllum að enda básarnir bara tólf, en það er frábært að fá svona jákvæð viðbrögð og vonandi getum við stækkað svæðið og byggt þetta enn meira upp á næstu árum. Nú þurfum við aftur á móti að sníða okkur stakk eftir vexti vegna þeirra takmarkana sem eru í gildi,“ segir Róbert og telur upp sem dæmi möndlubás, dóminískan götubita, smávörusala og hönnuði.

Róbert segir ákveðnar áskoranir jafnvel þó að markaðurinn sé utandyra þar sem ekki séu sömu reglur í gildi og innanhúss.

„En við komum því vel til skila að fólk passi upp á tveggja metra regluna og hvaðeina. Það er rúmt um alla og við fylgjumst vel með þessu.“


Jólalegt og kósí


Mikið var lagt upp úr því að gera svæðið jólalegt og kósí eins og Róbert orðar það og er ekki annað að sjá en vel hafi tekist til.

„Við viljum að fólk komi hingað í jólafíling. Það er skemmtilegt svæði í kring og miðborgin iðar af lífi svo við getum aðeins gleymt okkur án þess að gleyma okkur alveg. Allt um kring eru frábær kaffihús og veitingastaðir og því um að gera að verja deginum í miðborginni og skoða hvað er í kring enda skemmtilegir hlutir að poppa upp.“

Í Hjartagarðinum eru 12 sölubásar opnir um helgar frá 13 til 18 en opnunartími mun rýmka þegar nær dregur jólum. Mynd/Aðsend

Róbert segir von á gestum á við Grýlu og Leppalúða og þeirra syni. „Það verða svo einhverjir „pop up“ viðburðir, tenórar, létt og lítil söngatriði og fleira en þetta verður ekki auglýst.

Jólamarkaðurinn er opinn laugardag og sunnudag frá klukkan 13 til 18 en opið verður fleiri daga og eitthvað lengur þegar nær dregur jólum. „Við samstillum okkur þá með verslununum í kring,“ segir hann og bendir á að hægt sé að fylgjast með á Facebook.


Jólakvosin við Ingólfstorg

Á hádegi í dag, laugardag, verður Jólakvosin við Ingólfstorg opnuð en þar verður markaður við skautasvell Nova. Markaðurinn verður með fjölbreytta bása með gómsætum kræsingum frá veitingastöðum í grenndinni, Grill- og Fismarkaðnum og Skúla Craft Bar. Eins verður Sirkus Íslands með karnivalbás þar sem selt verður kandífloss og popp og sölubásar með fjölbreyttum og skemmtilegum vörum.

Novasvellið á Ingólfstorgi hefur verið opnað sjötta árið í röð en því er skipt upp í tvö sóttvarnahólf og nauðsynlegt er að panta tíma til að skauta fyrir fram. ?Mynd/Aðsend

Skautasvellið


Novasvellið hefur verið sett upp á Ingólfstorgi í sjötta sinn og segir Magnús Árnason hjá Nova að samhugur hafi verið innan teymisins um að láta þennan mikilvæga þátt jólanna ekki vanta þrátt fyrir samkomutakmarkanir.

„Auðvelda ákvörðunin hefði verið að hætta við Novasvellið þar sem framkvæmdin er erfiðari, mun dýrari og færri munu komast inn á svellið en verið hefur. En við finnum að fólk er sérstaklega þakklátt fyrir þetta framtak í ljósi þess hversu lítið er um viðburði um þessar mundir og hversu mikið við þurfum öll á því að halda að halda gleðinni gangandi.“


Brýnt að bóka með fyrirvara


Undanfarin ár hafa um 20 þúsund manns skautað á Novasvellinu á Ingólfstorgi og yfir 150 þúsund heimsóknir verið inn á svæðið.

„Það er ljóst mál að mun færri munu eiga kost á því að nýta þetta tækifæri en brýnt er að fólk bóki sér tíma með fyrirvara til að nýtingin verði sem best og sem flestir fái að njóta,“ útskýrir Magnús.


Til að viðhalda sóttvörnum verða miðar á svellið eingöngu seldir í gegnum Nova-appið og vefinn og þarf þar að velja sérstakan tíma. Svellinu er svo skipt upp í tvö sóttvarnahólf til að vanda stýringu og talningu inn á það. Eins gætir starfsfólk þess að spritta allan búnað og snertifleti eftir notkun.