Benedikt Rúnar Guðmundsson, landsliðsþjálfari kvenna í körfubolta, var hakkaður á Instagram og birtar myndir sem gáfu til kynna að hann væri haldinn kvenfyrirlitningu.
Benedikt birti í gærkvöldi langa færslu á Facebook-síðu sinni í tilefni fréttar sem birtist um málið. Hann segir frá því að það sé ekki svo langt síðan hann byrjaði á Instagram og hann hafi stundað það þar að setja inn svokallaðar „memes“ í „story“ á Instagram og það hafi létt honum mikið lundina í gegnum Covid. Hann segir að fyrst hafi hann ekki alveg skilið um hvað myndirnar snerust en eftir því sem á leið hafi hann byrjað að senda slíkar myndir á hóp af fólki.
Markmiðið að áframsenda húmor
„Síðan Covid skall á hef ég sent ca 300 memes. Flest voru tengd Covid, einhver voru skot á sjálfan mig, einhver skot á karlmenn, einhver skot á konur og önnur skot á hitt og þetta. Ekkert af þeim átti að vera móðgandi né sýndi hold á hvorki karl- eða kvenmanni. Markmiðið var bara að áframsenda húmor og létta fólki lundina,“ segir Benedikt sjálfur.
Hann segir að á einum tímapunkti hafi hann þó fengið skilaboð frá fyrirliða kvennalandsliðsins sem innihélt um sjö til átta „memes“ af þessum rúmlega 200 sem hann hafði sent. Hún hafði fengið það sent og þá var búið að sjóða saman þessi sjö til átta og segir Benedikt að þegar það hafi verið gert hafi verið vel skiljanlegt að hún hefði áhyggjur.
„… meðal annars af því hvort ég væri haldinn kvenfyrirlitningu og stundaði það að skjóta á konur í frítíma mínum. Það sem var verst var að 1-2 voru á gráu svæði að mínu mati en ég hafði aldrei séð þau áður. Samt var eins og ég hefði sent þau frá mér. Það var hrikaleg upplifun að sjá eitthvað, sem ég vissi að ég myndi aldrei senda frá mér en samt eins og ég hefði sent það. Ég var farinn að efast um sjálfan mig og farinn að velta fyrir mér hvort ég væri búinn að tapa glórunni,“ segir Benedikt.
Kærði brotið
Hann segir að í kjölfarið hafi hann leitað til lögreglunnar og þar komist að því að einhver hafi brotist inn í reikninginn hans og sent þessi skilaboð þannig.
„Ég get ekki lýst því hversu mikil vonbrigði það voru að komast að því. Að einhver leggi slíkt á sig til að koma höggi á mann brýtur mann niður. Eftir mörg ár í mínum bransa hefur maður þurft að taka marga slagi og verið umdeildur að sama skapi. En þarna upplifði ég eins og einhver vildi mér mjög illt,“ segir Benedikt.
Hann lagði svo inn kæru og var kallaður á fund stuttu síðar. Áður en kom að þeim fundi fær hann þó símtal frá manneskjunni sem hafði tekið þessi „memes“ saman og sent á fyrirliðann. Hann segir að hann ætli ekki að gefa það upp hver það er og að hann hafi fellt kæruna niður eftir að aðilinn baðst afsökunar.
Hann átti síðar samtal við alla leikmenn landsliðsins og fór yfir málið með þeim auk forsvarsmanna KKÍ.
„Þar var mér tjáð að málinu væri lokið og fyrirliði liðsins lætur mig vita að leikmenn séu sáttir og við tókum góða æfingahelgi. Síðan þá erum við búin að æfa mörgum sinnum saman og spila marga landsleiki þar sem það eru ca 14 mánuðir síðan,“ segir Benedikt en bætir við að í tilefni fréttarinnar sem birtist um málið ætli hann að leggja öll spilin á borðið og birta öll 300 „memes“ sem hann hefur sent.
Færslu Benedikts er hægt að lesa í heild sinni hér að neðan.
