Stjórn Framsóknarfélags Reykjavíkur fordæmir harðlega þau ummæli sem þingmenn Miðflokks og Flokks fólksins viðhöfðu um samstarfsfólk sitt á Klaustur bar í síðustu viku. Þetta kemur fram í tilkynningu frá félaginu.

Þá er því jafnframt hafnað að orðræða sem þessi viðgangist almennt meðal fólks í stjórnmálum á Íslandi og finnst með þeim orðum harkalega vegið að fólki í öllum flokkum eða hvar sem það starfar í stjórnmálum.

Segir að það að starfa í stjórnmálum sé hugsjónarstarf og óeigingjarnt starf sem að mestu leyti er unnið í sjálfboðavinnu sem það geri í einlægum áhuga til að bæta samfélag sitt en ekki til að ota sínumtota og níða mann og annan. 

Stjórn félagsins telur viðkomandi þingmenn rúna trausti og ei sætt á Alþingi sem fulltrúar lands og þjóðar.

Áður hafði forseti Íslands, Guðni Th Jóhannesson, lýst því yfir að sér hafi ofboðið ummæli þingmannanna og þá segir forsprakki samfélagsmiðlaherferðarinnar #Karlmennskan að þau séu góður vitnisburður um eitraða karlmennsku.

Yfirlýsingin í heild sinni:

Stjórn Framsóknarfélags Reykjavíkur (FR) fordæmir harðlega þau ummæli sem þingmenn Miðflokks og Flokks fólksins viðhöfðu um samstarfsfólk sitt á Alþingi á veitingastaðnum Klaustur þann 20. nóvember sl.

Það að kjörnir fulltrúar séu uppvísir um að viðhafast svo viðurstyggileg ummæli í garð kvenna, fatlaðs fólks og samkynhneigðra eins og nú hefur verið ljóstrað upp um er með öllu óafsakanlegt.

Stjórn FR hafnar því að orðræða sem þessi viðgangist almennt meðal fólks í stjórnmálum og finnst með þeim orðum harkalega vegið að fólki í öllum flokkum eða hvar sem það starfar í stjórnmálum.

Það að starfa í stjórnmálum er hugsjónarstarf og óeigingjarnt starf sem að mestu leyti er unnið í sjálfboðavinnu þeirra sem það gera. Fólk gerir það af einlægum áhuga til að bæta samfélag sitt en ekki til að ota sínum tota og níða mann og annan.

Stjórn FR telur viðkomandi þingmenn rúna trausti og ei sætt á Alþingi sem fulltrúar lands og þjóðar.

Stjórn Framsóknarfélags Reykjavíkur