Framkvæmdastjórn Evrópuráðsþingsins hafnaði í dag á fundi sínum í París umsókn um að nýr stjórnmálahópur yrði viðurkenndur á þinginu. Umsókn stjórnmálahópsins hefur verið afar umdeild en meðlimir umsóknarinnar koma úr stjórnmálaflokkum sem hafa til dæmis gefið sig út fyrir að vera á móti innflytjendum og hælisleitendum.

Rósa Björk Brynjólfsdóttir, þingmaður Vinstri grænna, og Þórhildur Sunna Ævarsdóttir, þingmaður Pírata, hafa leitt andstöðuna við að viðurkenna hópinn. Uppgangur öfgahægriflokka hefur verið áberandi í umræðunni upp á síðkastið en Katrín Jakobsdóttir forsætisráðherra fjallaði til dæmis um málið í ræðu sinni við opnun NORA-ráðstefnunnar í gær.

„Þetta sýnir að það er hægt að sporna við hatursorðræðu og kynþáttahatri í stjórnmálum ef vilji er fyrir hendi. Þetta er frábær niðurstaða á tímum þegar vegið er stöðugt að mannréttindum.“ segir Rósa Björk í tilkynningu.

Þórhildur Sunna fagnar einnig niðurstöðunni og segir: „Við Rósa lögðum þrotlausa vinnu í það að standa vörð um gildi Evrópuráðsins í þessu máli og sú vinna hefur nú skilað þessum mikilvæga árangri í baráttunni við hatursorðræðu. Þetta eru þingmenn öfgahægriflokka, eins og Alternativ für Deutschland og Lega Nord sem bera enga virðingu fyrir gildum Evrópuráðsins, við gátum ekki samþykkt viðurkenningu þeirra og nú er ljóst að framkvæmdastjórnin gerir það ekki heldur. Því ber að fagna.“