Lyfjastofnun Evrópu, EMA, hefur komist að þeirri niðurstöðu að möguleg tengsl séu á milli bólusetningar með bóluefni AstraZeneca, sem nú ber nafnið Vaxzevria, og fágætra blóðtappa. Að því er kemur fram í tilkynningu frá stofnuninni ætti að flokka myndun blóðtappa sem mjög sjaldgæfa aukaverkun af bólusetningu.

Emer Cooke, for­stjóri EMA, greindi frá niðurstöðunum á blaðamannafundi í dag en þar ítrekaði hún að ávinningurinn af bólusetningu væri áfram metinn meiri en áhættan. Fólk ætti þó að vera meðvitað um að það væri möguleiki á myndun blóðtappa og blæðingarvandamála innan við tveggja vikna frá bólusetningu.

Sjá einnig
Skýr tengsl AstraZene­ca við blóð­tappa en enn ó­ljóst hvað veldur

Mögulegt að sterkt ónæmissvar sé skýringin

Tilkynningar sneru að blóðtöppum í æðum heilans (e. cerebral venous sinus thrombosis, CVST), í kviðholi (e. splanchnic vein thrombosis, SVT), og í slagæðum en samhliða því var magn blóðflagna einnig minnkað, svokallað blóðflagnafæð.

Nefnd stofnunarinnar skoðaði sérstaklega 62 tilfelli um blóðtappa í heila, CVST, og 24 tilfelli um blóðtappa í kviðholi, SVT, en af þeim tilfellum var að ræða átján dauðsföll.

Mögulegt er að skýringin fyrir aukaverkunum sé sterkt ónæmissvar sem leiðir til sjúkdóms sem er svipaður og sá sem sést þegar sjúklingar frá lyfið heparin (e. heparin induced thrombocytopenia, HIT). Verið er að rannsaka það nánar.

Sjá einnig
Lyfja­stofnun Evrópu segist ekki hafa komist að niður­stöðu

Áður óljóst hvort um orsakasamband væri að ræða

Lyfjastofnun Evrópu hefur undanfarnar vikur rannsakað bóluefni AstraZeneca eftir að tilkynningar um alvarlegar aukaverkanir, þar á meðal myndun blóðtappa, komu upp. Sérfræðinganefnd stofnunarinnar greindi frá því þann 18. mars síðastliðinn að engar sannanir væru fyrir því að um orsakasamband væri að ræða en þó væri ekki hægt að útiloka það.

Yfirmaður bólusetningaráætlunar EMA, Marco Cavaleri, greindi síðan frá því í gær að það væru skýr tengsl milli bólusetningar með bóluefni AstraZeneca og myndun blóðtappa en ekki væri ljóst hvað valdi. Lyfjastofnun Evrópu sendi í kjölfarið frá sér yfirlýsingu þar sem fram kom að stofnunin hafi ekki komið að endanlegri niðurstöðu.