Hafa birt ó­­­geð­­felldar upp­tökur líkams­mynda­véla frá hand­töku Tyre Nichols

Lögreglan í Memphis í Bandaríkjunum hefur birt upptökur úr líkamsmyndavél sem sýnir fimm lögreglumenn beita Tyre Nichols, 29 ára karlmann, hrottalegt ofbeldi við handtöku. Í upptökunni má einnig heyra Nichols kalla á eftir móður sinni en árásin átti sér stað aðeins nokkrum metrum frá heimili hennar.

Daily Mail greinir frá en þar má sjá upptökuna sem er vægast sagt sláandi. Lögreglustjórinn í Memphis segir myndefnið það versta sem hún hafi orðið vitni að.

Fimm lögreglumenn ákærðir

Nichols, sem er dökkur á hörund, var á leið heim til sín þann 7. janúar síðastliðinn þegar fimm lög­reglu­menn, sem allir einnig eru dökkir á hörund, stöðvuðu hann við um­ferðar­eftir­lit.

Hann reyndi í fyrstu að flýja af vett­vangi en svo þegar lög­regla reyndi að hand­taka hann urðu átök þeirra á milli. Hann var í kjöl­farið fluttur á spítala eftir að hann hafði kvartað undan því að ná ekki andanum.

Nichols lést á spítalanum þremur dögum eftir árásina og hafa lögreglumennirnir fimm verið ákærðir fyrir manndráp, stórfellda líkamsárás, mannrán og brot í starfi.

Joe Biden Bandaríkjaforseti bað íbúa í Tennesse í Memphis að halda friðsamleg mótmæli í gær í kjölfar birtingar upptökunnar. Myndbandið er í heild um klukkustund og er úr líkamsmyndavélum lögreglumanna sem komu að handtöku Nichols.

Ætla verjast ásökunum

Lög­reglu­mennirnir fimm sem ákærðir hafa verið vegna málsins eru: Tadarrius Bean, Demetrius Haley, Desmond Mills Jr, Emmi­tt Martin III og Justin Smith.

Þeir voru allir ráðnir í lög­regluna á síðustu sex árum en voru reknir í síðustu viku og færðir í fangelsi í gær.

Lög­maður tveggja þeirra segir þá ætla að verjast á­sökunum og að enginn hafi ætlað þessu að enda með þessum hætti.