Alþjóðaheilbrigðismálastofnunin (WHO) hefur kallað eftir auknu fjármagni til að aðstoða þá sem þurfa á því að halda vegna andlegra áhrifa COVID-19.

Þetta kemur fram í pistli sem birtist á heimasíðu WHO í dag og er unninn í samvinnu við Sameinuðu þjóðirnar.

Í pistlinum er fullyrt að þeim hafi fjölgað sem finni fyrir þunglyndi, svefnleysi og kvíða eftir að kórónaveirufaraldurinn skall á.

„Áhrif faraldursins á andlega heilsu fólks eru nú þegar farin að valda okkur miklum áhyggjum. Félagsleg einangrun, ótti við smit og skyndilegt fráfall fjölskyldumeðlima bætist ofan á áhrifin sem fylgja atvinnu- og peningaleysi,“ segir Tedros Adhanom Ghebreyesus, forstjóri WHO, í pistlinum.

Í Kína sagðist annar hver heilbrigðisstarfsmaður finna fyrir þunglyndi, 45 prósent sögðust finna fyrir kvíða og þriðjungur glímdi við svefnleysi. Í Kanada hefur tæplega helmingur heilbrigðisstarfsmanna óskað eftir sálfræðilegri handleiðslu að faraldrinum loknum.

Þá hefur áfengisneysla aukist um 20 prósent hjá 15-49 ára einstaklingum í Kanada.