Sænska verslanakeðjan H&M mun opna sína þriðju verslun hér á landi í október næstkomandi. Hún verður í nýja verslunarkjarnanum á Hafnartorgi, við gömlu höfnina í miðborg Reykjavíkur. H&M verslunin mun einnig hýsa fyrstu H&M Home á Íslandi. 

Fram kemur í tilkynningu að búðin verði um 2.400 fermetrar að stærð og á tveimur hæðum. Þá verði H&M fyrst til að opna í verslunarkjarnanum. Til sölu verður dömu- og herrafatnaður ásamt barnafatnaði, skóm og aukahlutum, auk gjafavöru og húsgagna.

„Geometrísk form eru eitt af aðal trendum haustsins, ásamt dramatískum og grípandi skreytingum og svokallaðri litablokkun, þar sem skærir litir ráða ríkjum,“ segir í tilkynningunni.

Sænski risinn opnaði fyrstu verslun sína í lok ágúst í fyrra í Smáralind, og önnur verslunin var opnuð mánuði síðar í Kringlunni. Keðjan seldi fatnað fyrir ríflega 2,5 milljarða króna hér á landi frá því að hún opnaði fyrst í Smáralind í lok ágúst í fyrra til loka maímánaðar.