Gunnar Smári Egilsson, fyrrum fjölmiðlamaður og formaður framkvæmdastjórnar Sósíalistaflokks Íslands, gefur kost á sér á lista flokksins fyrir alþingiskosningarnar í haust. Flokkurinn ætlar að bjóða fram lista í öllum kjördæmum sem verða kynntir í byrjun ágúst.
„Það hefur verið skorað á mig og kjörnefndin var að tala við mig og ég lofaði þeim að svara núna um helgina. Ef að þau geta notað mig þá er ég til,“ segir Gunnar Smári í samtali við RÚV.
Undanfarið hefur Sósíalistaflokkurinn verið að mælast með um fimm til sex prósenta fylgi í skoðanakönnunum og ætti því að ná mönnum á þing samkvæmt því. Þá segir Gunnar Smári það sæta tíðindum í íslenskri pólitík að stjórnmálaflokkur sem hafi enn ekki kynnt framboðslista mælist með fulltrúa á þingi. Hann rekur þetta meðal annars til þess að Sósíalismi sé í tísku meðal ungs fólks.
Listum verður stillt upp af sérstakri kjörnefnd en búist er við að hún ljúki störfum fyrstu vikuna í ágúst.
Gunnar Smári leiddi stofnun Sósíalistaflokksins árið 2017 en flokkurinn tók þó ekki þátt í alþingiskosningum sama ár. Flokkurinn bauð fram lista í sveitarstjórnarkosningunum 2018 í Kópavogi og Reykjavík. Hann hlaut 3,2 prósent atkvæða í Kópavogi og engan mann en 6,4 prósent í Reykjavík og einn borgarfulltrúa.
