Landsnefnd UN Women á Íslandi fordæmir þá kvenfyrirlitningu og hatursorðræðu sem Gunnar Bragi Sveinsson og fimm aðrir alþingismenn viðhöfðu á Klausturbar í síðustu viku. Nefndin segir utanríkisráðherrann fyrrverandi hafa skaðað orðspor HeForShe hreyfingarinnar.

„Þau ummæli sem vitnað hefur verið til eru algjörlega óásættanleg og staðfesta hve mikið verk er enn óunnið í baráttunni fyrir kynjajafnrétti á Íslandi,“ segir í tilkynningu frá nefndinni. 

Stella Samúelsdóttir, framkvæmdastýra UN Women á Íslandi, segir í tilkynningunni að starfsfólk UN Women á Íslandi sé harmi slegið og vonsvikið yfir að Gunnar Bragi hafi með þessum hætti skaðað orðspor Barbershop verkfærakistunnar og HeForShe hreyfingu UN Women sem gangi ekki síst út á að uppræta niðrandi tal um konur.