Gunnar Bragi Sveinsson, þingmaður Miðflokksins, afþakkaði þátttöku á málþingi Femínistafélags Háskóla Íslands um Frjósemi íslenskra kvenna, vegna þess að félagið tók undir yfirlýsingu Kvenréttindafélags Íslands sem tengdist Klausturmálinu.

Þetta kemur fram í orðsendingu sem Gunnar Bragi bað um að yrði lesin upp á málþinginu. Kvenréttindafélag Íslands sagðist í yfirlýsingu, fyrir fund velferðarnefndar 4. mars, mómælta því að fulltrúar stjórnar félagsins yrðu settir í þá stöðu að þurfa að sitja fund með þingmanni, Önnu Kolbrúnu Árnadóttur, sem tók þátt í hatursorðræðu á Klausturbar í nóvember. „Okkur finnst við samt verða að láta rödd okkar heyrast og viljum því taka þátt í fundinum fremur en að sitja heima,“ sagði Kvenréttindafélagið. Undir þetta tók Femínistafélagið.

Gunnar Bragi segir að yfirlýsing Kvenréttindafélagsins hafi „einkennst af einelti og rógburði gegn eina kvenkyns þingmanni Miðflokksins“. Því muni flokkurinn ekki senda fulltrúa á fundinn eða aðrar samkomur félagsins. „Með því að taka undir yfirlýsingu Kvenréttindafélagsins hefur Femínistafélagið gert sig sekt um samskonar einelti og Kvenréttindafélagið.“

Gunnar Bragi segir að hafi félagið áhuga á að ræða málefni kvenna og baráttumál félagsins fyrir kynjajafnrétti sem og öðrum sjálfsögðum mannréttindum sé forsvarsmönnum félagsins boðið að hitta fulltrúa flokksins við fyrstu hentugleika.

Stjórn Femínistafélags Háskóla Íslands segist taka einróma undir yfirlýsingu Kvenréttindafélagsins frá 4. mars. Hún eigi ekkert skylt við einelti og rógburð. Konur séu ekki yfir gagnrýni hafnar og kyn þingmanns Miðflokksins sem á sæti í velferðarnefnd komi yfirlýsingu Kvenréttindafélagsins ekkert við – heldur aðeins þátttaka viðkomandi í Klausturmálinu. „Félaginu þykir miður að Gunnar Bragi reyni að láta líta út fyrir að yfirlýsing Kvenréttindafélagsins hafi eitthvað með kyn þingmannsins að gera. Það að ætla að bera fyrir sig kyn til að sleppa við gagnrýni á gjörðir einstaklinga þykir okkur ámælisvert. Það er þingflokknum einnig ekki til framdráttar að einungis ein kona sé innan þeirra raða.“

Þá segir að fyrst Gunnar Bragi geti hitt meðlimi Femínistafélags Háskóla Íslands við fyrstu hentugleika sé honum velkomið að mæta á málþing félagsins og ræða við þau fyrir opnum tjöldum.