Gul veðurviðvörun hefur verið gefin út fyrir Suðausturland og tekur hún gildi á miðnætti. Þar er spáð norðaustan hvassviðri eða stormi og talsverðri rigningu.

Í dag er spáð fremur hægum vindi og vætu í flestum landshlutum. Líkur eru á súld og þokumóðu fram eftir degi, einkum norðvestanlands. Hiti verður á bilinu 8 til 15 stig og má reikna með að hlýjast verði á Norðausturlandi.

Í kvöld kemur lægð upp að landinu úr suðri og fer að hvessa suðaustanlands. Þar er spáð stormi í nótt, vestan Öræfa, með talsverðri rigningu. Á morgun er útlit fyrir áframhaldandi austanátt með vætu víðast hvar, einkum um austanvert landið, en snýst í sunnanátt um kvöldið og dregur úr úrkomu.

Seinna í vikunni er meinlaust veður í kortunum: Fremur hægur vindur og rigning með köflum, en stefnir í hlýnandi veður og bjart um norðaustanvert landið um helgina.

Veðurhorfur á landinu næstu daga:

Á fimmtudag:
Suðlæg átt 3-10 m/s. Rigning með köflum og hiti 8 til 12 stig, en þurrt og bjart norðaustanlands með hita á bilinu 12 til 18 stig.

Á föstudag:
Fremur hæg suðlæg eða breytileg átt. Dálítil væta vestantil, annars þurrt að kalla. Hiti víða 10 til 15 stig.

Á laugardag:
Vestlæg átt, 3-10. Allvíða skúrir, einkum síðdegis, en þurrt að kalla austanlands. Hiti breytist lítið.

Á sunnudag og mánudag:
Útlit fyrir sunnanátt með rigningu sunnan- og vestantil, annars þurrt og bjart með köflum. Hlýnandi veður á Norðausturlandi, annars lítil breyting í hita.