Veðurstofan hefur gefið út gula viðvörun á Austfjöðrum og tekur hún gildi í nótt. Talsverðri eða mikilli rigningu er spáð á Austfjörðum í nótt og þangað til síðdegis á morgun en þá dregur úr úrkomuákefð. Í ljósi aðstæðna er Seyðisfjörður viðkvæmur fyrir rigningu og Eskifjörður að einhverju leyti einnig. Spáð er uppsafnaðri úrkomu á Seyðisfirði um 50 mm á þeim tíma sem viðvörunin gildir.

Gult ástand er á Austfjöðrum frá klukkan eitt í nótt til klukkan þrjú á morgun. Talsverð eða mikil rigning verður á svæðinu.
Fréttablaðið/Skjáskot

Annars er spáð sunnan 5 til 13 metrum á sekúndu og skúrum eða slydduéli en léttskýjað á Norður- og Austurlandi.

„Lægð sem er enn langt suður í hafi er á leið norðaustur og liggur braut hennar skammt suðaustur af landinu. Skil frá henni nálgast því landið úr suðri með austan hvassviðri og rigningu um sunnanvert landið síðdegis, en hægari vindur verður norðan til á landinu og þykknar upp þar," segir í hugleiðingum veðurfræðings.

Þá verður ákveðin norðaustanátt í nótt og í fyrramálið, víða dálítil rigning eða slydda, en talsverð rigning fyrir austan. Inn til landsins og til fjalla má þó búast við að úrkoman sé í formi snjókomu. Síðan taka við stífar norðlægar áttir með kólnandi veðri, slyddu og síðar snjókomu fyrir norðan, en styttir að mestu upp sunnanlands. Hiti 0 til 5 stig, en hiti kringum frostmark fyrir norðan.

Veðurhorfur á landinu næstu daga

Á sunnudag:
Norðan og norðvestan 10-18 metrar á sekúndu, hvassast á Vestfjörðum og með suðurströndinni, en hægari austanlands. Slydda eða snjókoma á norðanverðu landinu og skúrir eða él suðvestan til, en þurrt að kalla á Suðausturlandi. Hiti nærri frostmarki.

Á mánudag og þriðjudag:
Ákveðin norðanátt með snjókomu eða éljum á norðanverðu landinu en bjart með köflum sunnan heiða. Víða vægt frost.

Á miðvikudag og fimmtudag:
Útlit fyrir áframhaldandi norðanátt með éljum, en léttskýjað syðra og talsvert frost á öllu landinu.