Gunnar Einarsson, bætjarstjóri og oddviti meirihlutans í Garðabæ, hefur ákveðið að hætta sem bæjarstjóri að loknu kjörtímabili.

Þetta kemur fram í tilkynningu frá Gunnari.

Að loknu kjörtímabili hefur Gunni starfað sem bæjarstjóri Garðabæjar í 17 ár og verður orðinn 67 ára.

„Ég kom til starfa hjá Garðabæ 25 ára gamall og starfaði sem íþrótta- og tómstundafulltrúi og síðar sem forstöðumaður fræðslu- og menningarsviðs áður en ég var ráðinn bæjarstjóri árið 2005. Ég hef varið rúmlega 40 árum starfsævi minni í þjónustu við Garðbæinga. Á þessu langa tímabili hef ég tekið virkan þátt í uppbyggingu bæjarins bæði sem embættismaður, stjórnmálamaður og þátttakandi í félagsstarfi innan bæjarmarkanna. Jafnframt hef ég fengið tækifæri frá vinnuveitandanum Garðabæ á að mennta mig til hæstu gráðu,“ segir Gunnar í tilkynningunni.

Gunnar segist fullur þakklætis. „Þakklæti fyrir að fá tækifæri til að hafa áhrif á samfélagið Garðabæ, að starfa með frábæru samstarfsfólki hvort heldur í stjórnmálum og/eða í starfi mínu sem embættismaður og síðast en ekki síst almennt góð samskipti við bæjarbúa.“

Í lokin segist Gunnar stoltur af því góða samfélagi sem Garðabær sé. Það bíði annarra að leiða starfið áfram.

Fréttin hefur verið lagfærð, rangt var farið með nafn Gunnars í upphafi. Fréttablaðið biðst velvirðingar á því.