Guð­laugur Þór Þórðar­son er enn efstur í próf­kjöri Sjálf­stæðis­flokksins í Reykja­vík sam­kvæmt nýjustu tölum sem lesnar voru upp í beinni út­sendingu á Face­book síðu Sjálf­stæðis­flokksins núna klukkan 21:00.

Talin hafa verið 3113 atkvæði. Í fyrsta sæti með 1525 atkvæði er Guðlaugur Þór. Í öðru með 2116 atkvæði í 1.-2. sæti er Áslaug Arna Sigurbjörnsdóttir dómsmálaráðherra. Í þriðja sæti með 1260 atkvæði í 1-3. sæti er Diljá Mist Einarsdóttir, aðstoðarkona Guðlaugs.

Guðlaugur hefur aðeins 100 atkvæða forskot á Áslaugu þegar 3113 atkvæði hafa verið talin. Munurinn minnkar því á milli þeirra frá fyrstu tölum. Diljá Mist er nokkuð örugg í þriðja sæti en 420 atkvæði skilja milli hennar og Brynjars í það sæti. Þá er gríðarlega mjótt á munum milli Brynjars sem er í 4. sæti sem stendur og Hildar Sverrisdóttur. Hana vantar aðeins 17 atkvæði í það sæti til að ná Brynjari.

Sjá einnig
Fyrstu tölur Guð­laugi í vil

7500 manns höfðu kosið þegar kjör­staðir lokuðu klukkan 18:00. Endan­legar tölur munu liggja fyrir þegar allar kjör­deildir hafa verið gerðar upp.

Mikil þátt­taka hefur verið í próf­kjörinu og var ör­tröð á bíla­stæði Val­hallar nú síð­degis þegar Frétta­blaðið bar að garði. Kjör­staðir lokuðu klukkan 18:00. Hluti kjör­stjórnar lokaði sig inni á 2. hæð í húsinu nú síð­degis og hefur verið þar að telja at­kvæði síðan.

Þrettán manns eru í fram­­boði í próf­­kjörinu sem er sam­eigin­­legt fyrir bæði Reykja­víkur­­kjör­­dæmi. Greint verður frá næstu tölum klukkan 23:00 í kvöld eða mögulega fyrr, gangi talning vel.

Sundurliðun talna þegar 3113 atkvæði hafa verið talin má nálgast hér.

Niðurstöður samkvæmt nýjustu tölum:

Guðlaugur Þór Þórðarson utanríkisráðherra efstur með 1.525 atkvæði.

Í öðru sæti er Áslaug Arna Sigurbjörnsdóttir, dómsmálaráðherra með 2.116 atkvæði í 1. – 2. sæti.

Í þriðja sæti er Diljá Mist Einarsdóttir með 1.260 atkvæði samanlagt í 1. – 3. sæti.

Í fjórða sæti er Brynjar Níelsson með 1.164 atkvæði samanlagt í 1. – 4. sæti.

Í fimmta sæti er Hildur Sverrisdóttir með 1.573 atkvæði samanlagt í 1. – 5. sæti.

Í sjötta sæti er Birgir Ármannsson með 1.849 atkvæði samanlagt í 1. – 6. sæti.

Í sjöunda sæti er Kjartan Magnússon með 1.484 atkvæði samanlagt í 1. – 7. sæti.

Í áttunda sæti er Sigríður Á. Andersen með 1.373 atkvæði samanlagt í 1. – 8. sæti.

Fréttin hefur verið uppfærð.