Ársþing Krabbameinsfélags Íslands fór fram í hádeginu. Í ályktun sem samþykkt var kemur fram að allt stefnir í að skimanir fyrir brjóstakrabbameinum falli niður tímabundið í að minnsta kosti fjóra mánuði frá næstu áramótum. Verði svo má gera ráð fyrir að greining og meðferð sjúkdómsins dragist úr hófi fram fyrir tugi kvenna.

Heilbrigðisráðherra hefur ákveðið að Landspítali og Sjúkrahúsið á Akureyri taki við brjóstaskimunum frá næstu áramótum en Landspítali hefur óskað eftir að því verði frestað til 1. maí.

Samningur Sjúkratrygginga við Krabbameinsfélagið um skimanir rennur út um áramót og ekki liggur fyrir hver muni sinna skimununum þar til Landspítali er tilbúinn til að taka við verkefninu.

Áskorun um innleiðingu íslensku krabbameinsáætlunarinnar

Heilbrigðisráðherra samþykkti íslenska krabbameinsáætlun í upphafi síðasta árs. Slíkar áætlanir hafa sannað gildi sitt í öðrum löndum og verið lykill að árangri í baráttunni við krabbamein.

Krabbameinsfélagið skorar á heilbrigðisráðherra að hraða vinnu við forgangsröðun markmiða í áætluninni og leggja hið fyrsta fram tímasetta og fjármagnaða framkvæmdaáætlun.

„ Í slíkri vinnu er samstarf við sjúklingasamtök mikilvægt. Krabbameinsfélagið ítrekar áður framkominn vilja til að leggja heilbrigðisyfirvöldum lið við verkefnið. Niðurstöður vinnufundar félagsins um krabbameinsáætlunina liggja fyrir og eru mikilvægt innlegg í slíka forgangsröðun ráðherra."

Batahorfur góðar hér á landi

Brjóstakrabbamein er langalgengasta krabbamein hjá konum. Árlega greinast að meðaltali 220 konur með sjúkdóminn á ári á Íslandi.

„Batahorfur eru mjög góðar hér á landi, sérstaklega ef sjúkdómurinn greinist snemma og því mikilvægt að skimanir falli ekki niður."

„Árangur varðandi brjóstakrabbamein hefur verið með ágætum hér á landi, en ef við viljum halda í þann góða árangur má hvergi slaka á."

Þá segir að sú staða sem blasir við í nánustu framtíð er fullkomlega óásættanleg.

Ristilskimun átti að hefjast árið 2017

Samkvæmt samkomulagi Krabbameinsfélagsins og Velferðarráðuneytisins frá árinu 2016 stóð til að hefja skimun fyrir krabbameinum í ristli og endaþarmi haustið 2017. Félagið og ráðuneytið undirbjuggu verkefnið í sameiningu og lögðu í það 45 milljónir.

„Þrátt fyrir vandaðan undirbúning hafa heilbrigðisyfirvöld frestað því ítrekað að hefja skimunina og enn liggur ekki fyrir hvenær hún hefst."