Áætlað er að gistinætur á hótelum í júní hafi dregist saman um 79% frá sama tíma í fyrra samkvæmt tilraunatölfræði Hagstofunnar.

Nýting hótelherbergja í maí lækkaði úr 56% í maí í fyrra niður í 9% síðastliðinn maí.

Í maí fækkaði skráðum gistinóttum um 87%, úr 570 þúsund í tæplega 76 þúsund, samanborið við maí í fyrra. Þar af drógust gistinætur á hótelum saman um 88%, úr 315 þúsund í 37 þúsund, er fram kemur í skammtímahagvísum ferðaþjónustunnar.

Á sama tíma minnkaði framboð hótelherbergja um 26% í kjölfar þess að 47 hótel höfðu lokað í maí.

Farþegum fækkaði um 96%

Í júní fækkaði brottfararfarþegum um 95,7% samanborið við sama mánuð í fyrra, úr 259 þúsund í rúmlega 11 þúsund. Séu síðustu 12 mánuðir bornir saman við sama tímabil árið áður hefur farþegum fækkað úr rúmlega 2,9 milljónum í rúmlega 1,8 milljónir, eða um 35%.

Bílaleigubílar í umferð voru 15.600 talsins í júlí og fækkaði þeim um 37% samanborið við sama mánuð síðasta árs.