Aðalsteinn Leifsson, ríkissáttasemjari, segir það ef til vill hafa verið óvenjulegt að ákveðið hafi verið í gær að fresta sameiginlegum fundi og fara þess í stað í heimavinnu. Dagurinn leggist þó vel í hann.
„Það fóru allir í sína heimahaga og áttu þar góð samtöl. Og ég veit að það var mikil vinna langt fram eftir kvöldi hjá mörgum. Síðan setjumst við fersk niður í dag til að skoða og máta og sjá hvort það séu einhverjar lausnir,“ segir Aðalsteinn, og heldur áfram:
„En eins og ég hef sagt áður, þá eru þetta gríðarlega viðkvæmar og erfiðar viðræður.“
Þá séu fundir bókaðir til klukkan sex í dag og hann reikni með að allir aðilar verði í þéttri vinnu.
„Við sjáum til hvernig þetta þróast, en ég skil það vel að það er mikið undir og það er mikið álag á fólki. Það er vandasamt verkefni og oft vanmetið að vera í samninganefndum, hvort heldur fyrir stéttarfélag eða launagreiðendur. Það er mikil pressa og auðvitað skynjum við það og gerum allt sem við getum til þess að samtalið verði gott,“ segir Aðalsteinn.
