Fólk sem var á leið frá Reykjavík til norðanverðra Vestfjarða fannst heilt á húfi í bifreið sinni á Kollafjarðarheiði í gærkvöldi.
Lögreglu barst tilkynning í gær um að fólkið hefði ekki skilað sér á áfangastað og ekki hefði heyrst frá því síðan síðdegis á föstudag. Þá var fólkið á leið vestur en ekki lá fyrir hvar fólkið var þá statt á leiðinni.
„Þar sem svo langur tími var liðinn frá því síðast heyrðist af fólkinu og ekkert til þess spurst síðan, var hafist handa við að nálgast upplýsingar um það svæði sem líklegast mátti telja fólkið á þegar það var síðast í símasambandi,“ segir í tilkynningu sem Lögreglan á Vestfjörðum birti á Facebook-síðu sinni í morgun.
Í framhaldi af því var áhersla lögð á að leita fólksins í nágrenni þjóðvegarins á svæðinu frá Bjarkalundi að Flókalundi, en einnig á Dynjandisheiði, sem og Þorskafjarðarheiði og Kollafjarðarheiði.
Í skeyti lögreglu kemur fram að björgunarsveitir frá Patreksfirði, Tálknafirði, Bíldudal, Þingeyri og Hólmavík hafi verið kallaðar út sem og þyrla Landhelgisgæslunnar, TF-GNA. Þá tóku lögreglumenn frá Patreksfirði, Hólmavík og Ísafirði einnig þátt í leitinni.
Það var svo rétt fyrir klukkan 21 í gærkvöldi að björgunarsveitin Dagrenning á Hólmavík tilkynnti að hún hefði fundið fólkið í bifreið sinni á Kollafjarðarheiði, heilt á húfi. Fólkinu var komið niður af heiðinni og til læknisskoðunar á Hólmavík.
„Mjög slæmt veður var á vettvangi um helgina og ekkert farsímasamband. Miðað við aðstæður gerði fólkið það eina rétta í stöðunni, að fara ekki úr bifreiðinni. Það má sterklega telja það meginástæðu þess að málið fór eins vel og raun bara vitni. Lögreglan á Vestfjörðum vill þakka björgunarsveitum á svæðinu og Landhelgisgæslunni fyrir þeirra mikilvægu verk í þessari leit.“
