Gátu ekki hringt í neyðar­línuna af slysstað

Hlynur Snorra­son, yfir­lög­reglu­þjónn á Vest­fjörðum, segir brýnt að bæta síma­sam­band á Vest­fjörðum. Þeir sem komu að um­ferðar­slysinu í Skötu­firði í morgun þurftu að færa sig af slysstað til að komast í síma­sam­band við neyðar­línuna.

Þetta kom fram í kvöld­fréttum Stöðvar 2.

Þrír voru í bílnum sem fór út af veginum í Skötu­firði í Ísa­fjarðar­djúpi á ellefta tímanum í morgun og endaði úti í sjó. Um var að ræða par um þrí­tugt og ungt barn þeirra. Veg­far­endum sem komu að slysinu tókst að koma konunni og barninu á þurrt, en björgunar­bátur kom manninum til að­stoðar en hann var uppi á þaki bílsins. Öll voru þau flutt á sjúkra­hús í Reykja­vík.

„Einn þeirra er við á­gæta heilsu en hinir tveir eru enn þá undir læknis­með­ferð í Reykja­vík og við vonum bara það besta,“ sagði Hlynur.

Hlynur segir að áður hafi verið bent á að síma­sam­band sé með stopulum hætti í Ísa­fjarðar­djúpi og á nokkrum stöðum á Vest­fjörðum.

„Þarna þurfti fólk að færa sig af slysstað til þess að komast í síma­sam­band. Það er mjög brýnt, öryggisins vegna, að síma­sam­band sé gott á Vest­fjörðum eins og alls staðar annars staðar á landinu,“ sagði hann í fréttum Stöðvar 2.

Í til­kynningu sem Lög­reglan á Vest­fjörðum birti á Face­book-síðu sinni nú undir kvöld kemur fram að til­kynning um slysið hafi borist klukkan 10:16 í morgun.

„Veg­far­endurnir tveir, sem komu fyrstir á vett­vang, hófu þegar að gera ráð­stafanir til að koma fólkinu til bjargar. Þeim bættist liðs­auki þegar tveir aðrir veg­far­endur komu að,“ segir í til­kynningu lög­reglu en eins og að framan greinir komu þeir konunni og barninu úr bif­reiðinni og upp á land. „Hófu þessir fjór­menningar endur­lífgun. Þriðji aðilinn var fastur upp á þaki bíl­flaksins.“

Klukku­stund eftir að til­kynningin barst voru fyrstu við­bragðs­aðilar komnir á vett­vang og tóku við endur­lífgun og öðrum að­gerðum á vett­vangi.

Tvær þyrlur Land­helgis­gæslunnar komu á vett­vang, með tvo lækna og kafara. Fyrir voru á vett­vangi um 50 við­bragðs­aðilar, slökkvi­liðs­menn, sjúkra­flutninga­menn, björgunar­sveitar­menn og lög­reglu­menn, auk tveggja lækna sem komu frá Ísa­firði.

„Björgunar­sveitar­menn komu á vett­vang á tveimur björgunar­skipum, þeim Gísla Jóns frá Ísa­firði og Kobba Láka frá Bolungar­vík. Öku­manni var bjargað af bíl­flakinu um borð í annan björgunar­bátinn,“ segir í skeyti lög­reglu og því bætt við að maðurinn hafi ekki verið al­var­lega slasaður en orðinn kaldur.