Nýtt frum­varp að lögum sem kynnt hefur verið í Ohio í Banda­ríkjunum gæti leyft kennurum að bera skot­vopn í skólum eftir svo lítið sem sólar­hrings­þjálfun. Al Jazeera greinir frá þessu.

Fram­sögu­menn frum­varpsins vonast til þess að vopna­burður kennara eigi eftir að minnka tíðni skot­á­rása í skólum í Banda­ríkjunum, en tíðni skot­á­rása í Banda­ríkjunum hefur borist til tals eftir skot­á­rásina í Robb-grunn­skólanum í Texas þar sem ní­tján börn og tveir kennarar létu lífið.

And­stæðingar frum­varpsins, sem eru meðal annars stéttar­fé­lag kennara og stéttar­fé­lag lög­reglu­manna í Ohio segja vopna­burð kennara eiga bara eftir að gera skólana að hættu­legri stað.

Mike DeWine, ríkis­stjóri Ohio og með­limur repúblikana­flokksins, segist ætla hik­laust að skrifa undir lögin ef þingið í Ohio sam­þykkir þau.

Þeir kennarar sem kjósa að bera vopn í skólunum þurfa að ganga undir bak­grunns­at­hugun þar sem saka­vott­orð þeirra eru skoðuð meðal annars. Kennararnir þyrftu síðan að sitja átta tíma nám­skeið á hverju ári til þess að rifja upp.