Fyrstu 1.200 skammtarnir af bóluefni Moderna gegn COVID-19 komu til landsins snemma í morgun með fraktvél Icelandair frá Belgíu.

Efnið var flutt til dreifingarfyrirtækisins Distica í Garðabæ. Um er að ræða annað bóluefni gegn COVID-19 sem kemur til landsins en fyrstu skammtar af bóluefni Pfizer kom til landsins þann 28. desember síðastliðinn. Bólu­efni Moderna geym­ist við hærri hita en Pfizer bóluefnið sem geymist í um -70 gráðum. Bólu­efni Moderna geym­ist hins ­veg­ar við 15-20 gráðu frost.

„Við erum í morgun búin að fara yfir hita­stig í flutningum og lesa af hitasí­ritum sem fylgja sendingunni allan flutninginn. Við erum einnig búin að fara yfir vott­orð og önnur gæða­skjöl sem fylgja bólu­efninu,“ segir Júlía Rós Atla­dóttir, fram­kvæmda­stjóri Dis­ti­ca, í sam­tali við Frétta­blaðið.

Hún átti von á því að ef allt væri í lagi þá myndi bólu­efnið fara í dreifingu í dag. Sam­kvæmt upp­lýsingum frá heil­brigðis­ráðu­neytinu er stefnt á að hefja bólu­setningu með bólu­efninu á morgun.

Distica tók á móti bóluefninu í morgun og sér um dreifingu þess.
Mynd/Distica

Þessir 1.200 skammtar munu fara í að klára að bólu­setja fram­línu­starfs­menn. Þá þarf að endurbólusetja eftir fjórar vikur en von er á 1.200 skömmtum af bóluefni frá Moderna á tveggja vikna fresti út marsmánuð. Eftir það er ekki ljóst hversu mikið eða hvenær Ísland fái fleiri skammta af bóluefninu.

Á RÚV kemur fram að Heilsugæslu höfuðborgarsvæðisins fái 500 skammta til þess að bólusetja sjúkraflutningafólk og lögreglufólk í framlínustörfum og starfsmenn Farsóttarhússins.