Ítalski sportbílaframleiðandinn Ferrari verður ekki vændur um að stökkva snemma uppá rafbílalestina, en nú er þó kominn fram fyrsti Ferrari bíllinn með innstungu, þ.e. SF90 Stradale. Það þýðir þó ekki að hann sé hreinræktaður rafmagnsbíll, heldur með bæði brunavél og rafmótora. Í leiðinni fer hér öflugasti fjöldaframleiddi bíll Ferrari frá upphafi, enda hestöflin hvorki fleiri né færri en 986. Þau koma frá 769 hestafla V8 bensínvél og þremur samtals 217 hestafla rafmagnsmótorum. Einn þeirra er staðsettur milli vélar og sjálfskiptingar bílsins og sitt hvor mótorinn er svo á framhjólunum. Það gerir bílinn fjórhjóladrifinn.

Er 2,5 sekúndur í hundraðið

Ferrari SF90 Stradale er með 4 akstursstillingum, eDrive fyrir eingöngu akstur á rafmagni, Hybrid fyrir blöndu beggja, Performance en þá er brunavélin alltaf í gangi og Qualify þar sem hámarksafl rafmagnmótoranna er nýtt. Ferrari segir að þau auka 270 kíló sem bíllinn þyngist með rafhlöðunum og rafmótorunum sé meira en mætt með því auka afli sem fást úr rafmagninu. Bíllinn er aðeins 2,5 sekúndur í 100 km hraða og hámarkshraðinn er 340 km/klst. Ferrari SF90 Stradale er sem dæmi 0,4 sekúndum sneggri í hundraðið en hinn 710 hestafla Ferrari F8 Tributo og er 3 sekúndum sneggri að fara Fiorano tilkraunabraut Ferrari en F8 Tributo. Rafhlaða SF90 Stradale er ekki ýkja stór, eða 7,9 kW og því dugar hámarksafl rafmótoranna ekki lengi, en þó fyrir heilan hring á flestum keppnisbrautum. Hægt er að aka bílnum um 25 kílómetra á rafmagninu einu saman og með því má aka bílnum á allt að 135 km hraða. Söluverð Ferrari SF90 Stradale er 430.000 evrur í Evrópu, eða 60 milljónir króna.