Embætti landlæknis hefur verið með störf fyrrverandi læknis á Heilbrigðisstofnun Suðurnesja (HSS) til skoðunar frá því í lok ársins 2019. Málið er nú á borði lögreglu en er hann grunaður um vanrækslu og röð alvarlegra mistaka sem leiddu til andláts að minnsta kosti eins sjúklings. Fjallað var um málið í kvöldfréttum Stöðvar 2.

Í frétt Vísis um málið kemur fram að athugasemdir um læknirinn hafi borist Embætti landlæknis í kjölfar andláts konu á áttræðisaldri. Leikur grunur á að hann hafi sent sjúklinga í líknandi meðferð að óþörfu.

Læknirinn lét sjálfur af störfum þegar rannsóknin hófst í nóvember 2019. Samkvæmt heimildum Stöðvar 2 var rannsóknin umfangsmikil, um 50 blaðsíður. Í niðurstöðukaflanum kemur m.a. fram að maðurinn hafi gert mörg og alvarleg mistök á ýmsum sviðum.

Ekki er útilokað að fleiri starfsmenn HSS tengist málinu með einhverjum hætti.

HSS sendi frá sér yfirlýsingu í kjölfarið.

Yfirlýsing frá framkvæmdastjórn HSS

Heilbrigðisstofnun Suðurnesja (HSS) barst 18. þessa mánaðar álit frá Embætti landlæknis þar sem niðurstaða var sú að þjónustu stofnunarinnar við sjúkling sem lést á sjúkradeild síðla árs 2019 hafi verið verulega ábótavant og ekki í samræmi við fagleg viðmið og viðurkennt verklag.

Framkvæmdastjórn HSS lítur þessa niðurstöðu mjög alvarlegum augum og munum við gera allt sem í okkar valdi stendur til að koma í veg fyrir að slíkir atburðir endurtaki sig. Við hörmum atburðinn og hugur okkar er hjá aðstandendum. 

Eftir að málið kom upp var strax settur enn meiri kraftur í að bæta verkferla sem snúa að utanumhaldi og eftirfylgni með skjólstæðingum heilbrigðisstofnunarinnar. 

Læknirinn sem bar ábyrgð á meðferðinni var settur í leyfi og lét í kjölfarið af störfum við stofnunina. 

Jafnframt vísaði HSS umræddu máli til lögreglu eins og lög gera ráð fyrir. Af þeim sökum getur stofnunin ekki tjáð sig frekar um málið að svo stöddu. 

Fréttin hefur verið uppfærð.