Kona í Kali­forníu tilkynnti lögreglu fyrr á þessu ári að hún hafi fundið höfuð­kúpu manns í runna. Lög­reglunni hefur tekist að bera kennsl á manninn en hann er talinn hafa tekið eigið líf með heima­smíðaðri fall­öxi.

Maðurinn, Robert Enger, er talinn hafa byggt fall­öxina fyrir rúmum tveimur árum síðan. Fall­öxin var sex metrar á lengd og var út­búin með stórum stál gaddi frekar en öxi. Ná­grannar Enger segja hann hafa verið mjög færan hand­verks­mann sem átti við geð­rænan vanda að stríða.

Enger var 62 ára gamall þegar hann lést en hann sást síðast á lífi í júlí 2019 þegar hann fór á spítala með höfuð­á­verka sem lög­reglunni grunar að hafi komið til vegna fyrri til­rauna til að nota fall­öxina.

Lík mannsins var ekki upp­götvað fyrr en mun seinna en árið 2020 tók maður að nafni Robert Mel­vin Ross III upp ból­festu í húsinu. Ross á að hafa búið í húsinu sam­hliða líkams­leifum Enger svo mánuðum skipti. Hann er sagður hafa boðið þangað í veislur og met­am­feta­mín­neyslu.

Á þessu ári upp­lýsti maður lög­reglu um að hann hafi mætt til veislu í húsinu og séð rotnandi líkams­leifar manns. Ross er svo talinn hafa fjar­lægt höfuð­kúpuna og með­höndlað líkið.

Ross hefur verið á­kærður fyrir ó­lög­mæta hústöku og með­höndlun líkams­leifa, sam­kvæmt frétt hjá The Guar­dian.