Í dag má búast við norðan 10 til 15 m/s en heldur hvassara í vindstrengjum suðaustantil. Él norðanlands, en yfirleitt léttskýjað á Suður- og Vesturlandi. Hiti 0 til 7 stig. Lægir í kvöld, léttir til og frystir víða um land í nótt.

Enn eru gular viðvaranir á Norðurlandi eystra og Austurlandi en þær falla úr gildi þegar nær dregur hádegi.

Fram kemur í hugleiðingum veðurfræðings hjá Veðurstofunni að nokkuð hafi snjóað til fjalla á norðanverðu landinu í nótt þó að úrkoman hafi verið slydda eða rigning víðast hvar á láglendi.

Í dag verður norðan strekkingur og áframhaldandi éljagangur norðan heiða. Það mun draga úr ofankomu og vind er líður á daginn og í kvöld verður orðið bjart að mestu á öllu landinu. Hægum vindi og björtum nóttum fylgir hins vegar kólnun og líklegt er að frost mælist víða næstu nótt.

Snjórinn mun þó ekki stoppa lengi við í þetta skipti því á morgun er vaxandi suðaustanátt er skil frá næstu lægð nálgast úr suðvestri. Með skilunum þykknar upp og hlýnar á ný. Suðlægar áttir ráða svo ríkjum fram í miðja næstu viku með vætu af og til.

Veðurhorfur á landinu næstu daga

Á föstudag:
Hæg breytileg átt og víða bjartviðri. Hiti 2 til 7 stig, en kringum frostmark norðaustantil. Gengur í suðaustan 10-15 m/s og fer að rigna sunnan- og vestanlands um kvöldið.

Á laugardag:
Suðlæg átt, 10-18 m/s. Víða rigning, en þurrt að mestu um landið norðaustanvert. Hiti 4 til 11 stig, hlýjast norðaustanlands.

Á sunnudag:
Sunnanátt og rigning austantil á landinu, en hægari vindur og stöku skúrir á vesturhelmingi landsins. Hiti 4 til 11 stig, svalast á Vestfjörðum.

Á mánudag:
Fremur hæg suðlæg átt og skúrir sunnan- og vestanlands, annars bjart með köflum og þurrt. Hiti 2 til 8 stig, hlýjast syðst.

Á þriðjudag:
Stíf suðaustan- eða austanátt og rigning. Hiti breytist lítið.

Á miðvikudag:
Útlit fyrir austan- og norðaustanátt norðan- og austanlands með rigningu, en annars hægari og að mestu þurrt.