Fríverslunarsamningar milli EFTA-ríkjanna fjögurra og aðildarríkja efnahagsbandalags Argentínu, Brasilíu, Úrúgvæ og Paragvæ (Mercosur), er í höfn. Þetta kemur fram í tilkynningu frá Stjórnarráðinu og vef EFTA.

Leiðtogar frá EFTA og Mercosur ríkjunum funduðu í Buenos Aires frá 20. ágúst til 23. ágúst.

Með samningunum lækka tollar þeirrar vöru sem flutt er út frá Íslandi en viðskipti Íslands og Mercosur eru talsverð. Vöruútflutningur til Mercosur nam um 1,5 milljarði og vöruinnflutningur til Íslands frá ríkjum Mercosur nam um 24 milljörðum í fyrra. Í innflutningi til Íslands vegur áloxíð langþyngst en það er þegar tollfrjálst.

Sjávarafurðir njóta fulls tollfrelsis

Með þessum samningum munu nær allar sjávarafurðir Íslands njóta fulls tollfrelsis, sumar frá gildistöku samningsins en aðrar að loknum aðlögunartíma.

„Við höfum lagt mikla áherslu á að ljúka samningaviðræðum við Mercosur-ríkin og það er ánægjulegt að sá samningur sé nú í höfn. Markaðsaðgangur fyrir sjávarafurðir er sérstaklega mikilvægur fyrir okkur og hann eykst umtalsvert með þessum samningi,“ sagði Guðlaugur Þór Þórðarson utanríkisráðherra.

„Ég tel að við getum verið mjög sátt við þennan samning, sérstaklega þar sem hann er ekki síðri en sá sem Mercosur hefur nýlega samið um við Evrópusambandið."

Önnur saga með Evrópusambandið

Fríverslunarsamningurinn milli Evrópusambandsins og Mercosur er hins vegar í uppnámi vegna eldanna í regnskógunum í Brasilíu. Frakkar og Írar hafa hótað að rifta samninga standi Brasilíumenn ekki við skuldbindingar sínar í loftslagsmálum. Emmanuel Macron, forseti Frakklands, hefur ásamt Leo Varadktar, forsætisráðherra Írlands, gagnrýnt Brasilísk stjórnvöld og vilja báðir leiðtogar að stjórn Jair Bolsonaro stöðvi skógareyðinguna sem á sér stað í Brasilíu.