Emilía Borgþórsdóttir iðnhönnuður heldur námskeið við Endur­menntun Háskóla Íslands þann 25. maí næst­komandi fyrir þá sem vilja auka færni sína í að fegra útisvæði og leituðum við til Emilíu um nokkur góð ráð.

Emilía Borgþórsdóttir heldur námskeið við Endurmenntun Háskóla Íslands sem nefnist Aðkoman og útisvæðið.

„Þegar velja á útihúsgögn er mikilvægt að íhuga hvað getur staðið úti í íslenskri veðráttu,“ segir Emilía. „Ef ég væri að velja mér hús­gögn myndi ég byrja á að fá mér sófa því þeir nýtast betur en stólar og borð, enda geturðu lagst í sófann og sleikt sólina eða setið uppi og drukk­ið kaffið.

Ég myndi velja hús­gögn með þunnum textíl sem er þó gerður fyrir að vera úti og þola smá vætu. Til eru geymslukistur fyrir pullur og púða sem er mjög sniðugt ef pláss er fyrir slíkt eða jafnvel hafa það innbyggt í pallinn undir bekk.

Vasar, pottar og púðar


Varðandi smáhluti segir Emilía best að velja hluti sem ýta undir að við njótum veru okkar á pallinum þó fáir þeirra fái að dvelja úti allt sum­ar­ið. „Mikið af smáhlutunum fer inn og út eftir þörfum eins og bakki með drykkjum, kerti og þess háttar.

Emilía mælir með því að skreyta með vösum og pottum með blómum og greinum úr garðinum.

Það er sniðugt að nota púða og lítil borð til að fá liti á pallinn og gaman að fá samtal með litum við sumarblómin eða litina í garðinum. Eins lífga vasar eða pottar með afskornum blómum eða greinum úr garðinum mikið upp á.


Ég er mikið fyrir að hafa krydd- og matjurtir og maður þarf ekki stóran pall til að rækta smá,“ segir Emilía sem hefur lært að það sé um að gera að nýta alla mold sem til er og planta megi grænkáli og öðrum mat­jurt­um með sumarblómunum. „Ég hef séð fólk rækta kartöflur í síld­ar­tunnu og eins eru lóðréttir garðar eða gróðurveggir snilld.“


Lýsingin skiptir miklu


Emilía segir lýsingu geta skipt miklu, sérlega sitt í hvorum enda sumarsins og á veturna. „Ef þú ert með heitan pott skiptir máli að hafa þá leið sem farin er út í pott upplýsta til að lágmarka slysahættu. Annars er mjög fallegt að lýsa upp tré og almennan gróður. Eins eru til sólarrafhlöðuljós sem stinga má í ker og beð og geta komið vel út sem og gamla góða serían yfir pallinum.

Það má hafa mismunandi lýsingu og gæta þess að hafa hana í mismunandi hæð svo falleg birta komi á svæðið því það getur verið þreytandi að hafa lýsinguna alla í sömu hæð eða á einu plani.

Sólarrafhlöðuljós sem stinga má í ker og beð geta komið vel út sem og gamla góða serían yfir pallinum eins og sjá má hér. Mynd/Getty

Margnota húsgögn

Ég er alltaf hrifnust af húsgögnum eða hlutum sem nýta má á margvís­legan hátt. Það er hægt að verða sér úti um drumba sem þola að vera úti og mega veðrast og þá er hægt að nota sem borð eða kolla.

Bekki má nýta sem borð líka. Ef smíða eða steypa á þrep, getur verið sniðugt að hafa þau nógu stór svo hægt sé að nýta sem sæti. Það er gott að hafa formin eða strúktúrinn þannig að hægt sé að tylla sér hér og þar og þurfi ekki of mikið af húsgögnum.

Gott ráð er að nota þrep sem sæti líka og hafa þau þá nógu stór svo hægt sé koma fyrir pullum og púðum. Mynd/Getty

Það getur verið fallegt og nytsam­legt að búa til hátt borð við eða í kringum grillið þar sem pláss er fyrir mat og drykki. Til dæmis er hægt að hlaða það úr gömlum hell­um og hafa pláss fyrir allt sem við kem­ur grillinu eða jafnvel drykkja­stöð þegar heitt er í veðri.

Við það mætti bæta smá leikeldhúsi fyrir börn þar sem þau geta sullað aðeins og leikið sér. Ef þú ert með lítil börn gæti sandkassi á hjólum verið skemmtilegur.

Viðarhúsgögn þarf að verja með fúavörn hvort sem þau eru í lit eða ekki. En nú er til mikið af hús­gögnum úr steypu, plasti eða pólý­­húð­uðu járni sem krefjast lít­ils viðhalds.

En allur textíll getur upp­­litast af sólinni og fer ekki vel í brjáluðu veðri svo það þarf að vera hægt að kippa honum inn eða breiða yfir hann. Einnig gæti sól­tjald eða segl sem strekkt er yfir pall­inn verið góð vörn gegn sól og regni því oft er sólin mjög sterk hér á landi.

Á góðviðrisdögum jafnast fátt á við að njóta matar og drykkjar utandyra.

Emilía segir mottur geta hentað á grófara undirlag og eins til að brjóta upp rýmið ef um samlitan við er að ræða í palli eða húsgögnum.

„Þá geta þær komið með ferskari blæ og varnað því að húsgögnin renni sam­an við pallinn. Það er orðið mikið úrval af ofnum plastmottum sem eru mjög fallegar og þola nánast allt.“


Vandað val og viðhald


Emilía segir helsta sparnaðarráðið í þessum efnum vera að vanda valið og hugsa vel um húsgögnin. „Eins er hægt að nýta svo margt eins og vörubretti, sem er mjög vinsælt að setja pullur á.

Það er til mikið af ódýrum húsgögnum sem eru mjög fín með öðru. Eins þegar pallar eru byggðir að smíða úr pallaefninu bekk hvort heldur sem er með hallandi baki eða ekki, og jafnvel bæta við geymslu þar undir fyrir pullurnar.

Galdurinn er að reyna að auðvelda sér vinnuna þannig að þegar það kemur sólarglæta að maður geti hent sér út í 15 mínútur en þurfi ekki hálftíma til að undirbúa það.“