Ólafur Þór Ævarsson, sem tók við starfi framkvæmdastjóra lækninga á Reykjalundi fyrir rúmum hálfum mánuði, hefur sagt upp starfi sínu þar. Þetta kemur fram í yfirlýsingu sem hann sendi frá sér í dag.

Ólafur segist ekki hafa verið þátttakandi í þeim deilum sem hafa risið á staðnum en þær hafi engu að síður valdið honum áhyggjum og gert honum erfitt að sinna starfi sínu. „Vonir mínar um að geta við þessar aðstæður tekið þátt í að leiða starfsemina inn í framtíðina hafa dvínað,” segir í tilkynningunni.

„Niðurstaðan mín er því sú að best sé að ég láti af störfum á Reykjalundi. Ég óska þess að það geti orðið þáttur í því að stuðla að sátt til framtíðar og að mikilvæg starfsemi Reykjalundar fái að blómstra áfram sjúklingum til heilsubótar,” heldur hann áfram og óskar að lokum starfsfólki Reykjalundar og þeim sem taka nú við stjórn starfseminnar velfarnaðar í komandi verkefnum.

Hér má lesa yfirlýsingu Ólafs í heild sinni:

Ég sótti nýverið um starf framkvæmdastjóra lækninga á Reykjalundi og eftir að hafa verið metinn vel hæfur af tveimur hæfnisnefndum, en önnur þeirra var á vegum Landlæknis, var mér boðið starfið sem ég þáði. Ég hóf störf fyrir aðeins rúmlega hálfum mánuði.

Ég réði mig til starfa á Reykjalund því ég hafði sterka löngun til að gera gagn og taka þátt í því glæsilega starfi sem þar fer fram. Í krafti fyrri reynslu minnar á þessu sviði sá ég mikla möguleika til framtíðar í þróun endurhæfingar - ekki síst hvað varðar geðræna líðan og álagsveikindi.

Ég hef ekki á neinn hátt verið þátttakandi í þeim deilum sem hafa risið á staðnum. Þær hafa engu að síður valdið mér miklum áhyggjum og gert mér erfitt að starfa. Vonir mínar um að geta við þessar aðstæður tekið þátt í að leiða starfsemina inn í framtíðina hafa dvínað.

Niðurstaðan mín er því sú að best sé að ég láti af störfum á Reykjalundi. Ég óska þess að það geti orðið þáttur í því að stuðla að sátt til framtíðar og að mikilvæg starfsemi Reykjalundar fái að blómstra áfram sjúklingum til heilsubótar.

Ég óska starfsfólki Reykjalundar og þeim sem taka nú við stjórn starfseminnar velfarnaðar og velgengni í þeirra mikilvægu verkefnum.

Ólafur Þór Ævarsson, geðlæknir