Larry Miller, yfirmaður Jordan-merkisins hjá bandaríska íþróttavöruframleiðandanum Nike, hefur viðurkennt opinberlega að hafa myrt 18 ára mann.

Morðið átti sér stað fyrir 56 árum er Miller var einungis 16 ára. Frá þessu greindi hann í viðtali við Sports Illustrated. Eftir að félagi Miller var myrtur fór hann á fyllerí, vopnaður skammbyssu, og leitaði upp meintan morðingja vinar síns. Hann skaut þann fyrsta sem hann rakst á, hinn 18 ára gamla Edward White.

„Þetta var að éta mig upp að innan,“ segir Miller og á þeim tíma hafi hann verið „blákaldur gengjameðlimur“ á götum vesturhluta Fíladelfíu.

Miller gefur út ævisögu sína á næsta ári þar sem hann segir frá því hvernig honum tókst að snúa baki við glæpum og ná miklum frama hjá Nike.

Hann var dæmdur til fangelsisvistar fyrir morðið og segist aldrei hafa leynt afbrotaferli sínum í starfsumsóknum. Það er þó ekki fyrr en nú sem hann játaði brot sitt fyrir börnum sínum, vinum og nánu samstarfsfólki, þar á meðal körfuboltagoðsögninni Michael Jordan.

Miller og Michael Jordan eru nánir vinir og sam­starfs­fé­lagar.
Fréttablaðið/Getty

Það segir hann hafa verið „afar erfitt. Þar sem ég reyndi að komast undan þessu í mörg ár, ég reyndi að fela þetta og vonaði að fólk kæmist ekki að þessu.“

Miller hefur starfað hjá Nike síðan árið 1997 og er yfir daglegum rekstri körfuboltadeildar fyrirtækisins og vörumerkjanna Jordan og Converse. Hann var áður framkvæmdastjóri hjá matvælaframleiðendunum Kraft og Campell Soups. Auk þess var hann lengi yfir körfuboltaliðinu Portland Trailblazers.

Miller segist vonast til þess að saga sín hjálpi ungmennum sem eiga á hættu að fara í undirheimana að snúa við blaðinu. Auk þess segir hann mikilvægt að fólk átti sig á því að mistök, sama hve alvarleg, stjórni ekki lífinu.